Shillong, Naitung 21: U Lat ka jy;la u Satya Pal Malik ha ka sngi Palei u la hap ban ai jingbthah ïa ka sorkar namar ka jingmynthi bad ka jingkyllut jong ka ïa ka jingdawa ki nonghikai SSA ki la dawa na ka sorkar ban pynlait noh ïa ka tulop bad ban kyntiew tulop ïa ki.
Haba kren sha ki lad pathai khubor u President ka Meghalaya Sarva Shiksha Abhiyan School Association u Babu Aristotle Rymbai hadien ba u la wan ïa kynduh ïa u Lat u la ïathuh ba ka jingleit ïakynduh jong ki ïa u Lat ka long ban kyrpad bau tuklar lem ba kin ioh noh ïa ka tulop ba san bnai kaba naduh u bnai Rymphang haduh u bnai Jylliew bad ba ka sorkar kan kyntiew tulop ruh ïa ki
U Babu Aristotle u la ïathuh ba u Lat ha ka por kaba ki ïa don lang u la Phone ïa u Myntri Rangbah ban kylli ïa ka daw ka jingsngap mynthi jong ka ïa ka jingdawa ki nonghikai.
“Namar ba u myntri Rangbah ka jylla u don sha rilum Garo u Lat u la kren ïa u lyngba ka mobile phone ban wad ïa ki daw jong ka jingsngap mynthi ka sorkar wat hadien ba ki nonghikai ki la hap ban wan thiah miet ha surok jong ka nongbah Shillong ban dawa ïa ka hok jong ki” ïathuh u Babu Aristotle
“U Lat ha ka jingïakren phone bad u Myntri Rangbah u la bthah ba ka sorkar baka dei ban pynkut noh syndon ïa ka jingeh kaba ki nonghikai SSA ki la ïa kynduh ha ki bun bun snem kiba la leit” ïathuh u Babu Aristotle
U Babu Aristotle u la ïathuh ruh ba na ka liang u Lat ka jylla u la rai ban shimkhia ïa kane ka mat jingdaw ki nonghikai ban kyntiew noh ruh ïa ka tulop jong ki kaba ki la dawa la slem bad ba ka sorkar pdeng ka dei ban pynlait noh ïa ka Adhoc Grant bad ka First Installment kaba dei sha ka jylla Meghalaya.
