Yn pahuh um ka Lummawbah ba la treikam ka pump-house thymmai, haduh 80,000 litar man ka sngi

Shillong, Naitung 07 : U Chief Adviser jong u Myntri Rangbah ka Jylla bad MLA barim ka Mylliem Bah Hamletson Dohling ha ka sngi Nyngkong u la plie paidbah ïa ka pump- house kaba thymmai ha Themshohnar, Lummawbah ha ryngkat ka jingdonlang ki Engineer ka PHE, u Rangbah Shnong ka Lummawbah, Bah Everest Thangkhiew, ki Rangbah Dong bad kumjuh ki paidbah nongshong shnong.
Haba kren ha ka jingïalang u Bah Hamlet u ïathuh ba da ka jingtreikam jong kane ka pump-house ba thymmai ki nong shong shnong nangne shakhmat kin ïoh kham pahuh ka um man ka sngi nalor ka um JJM ba ki ju ïoh haman la ki iing.
Da kaba pyntip ruh ba nangne shakhmat na katei ka pump-house kan ai um kumba 80,000 litar man ka sngi, u Bah Hamlet u la ong ba ka jingseisoh jong kano kano ka kam pynroi ha ki shnong ki thaw ka dei da ka jingtreilang ryngkat ryngkat ki nongïalam shnong naduh ka por ba u dang long kum u nongmihkhmat paidbah bad haduh mynta.
“Ka thong ba hakhmat jongngi ka long ban ïohi ban ïoh ïa ki kam pynroi ha ka shnong ka thaw naduh ka umbam umdih, ki lynti syngkien, ka koit ka khiah bad bun ki jingdonkam kiba man ka sngi. Kine baroh kin urlong tang lada ki nongïalam shnong ki trei ryngkat ryngkat,” u la ong.
Ha kane ka jingïalang la ïoh ruh ïa ka jingken na u Rangbah Shnong uba la pynpaw ka jingsngewnguh ïa u Bah Hamlet na bynta katei ka projek kaba kongsan bad kumjuh ïa ki ophisar ka tnad PHE nalor ki nongïalam shnong kiba ju trei ryngkat ryngkat ha ki kam baroh.