Mih ka PPA jong ka St. Peter’s H/S Mawjrong ban kyrshan ïa ka skul bad pynïatylli ki khynnah pule barim

Shillong, Naitung 05 : Ka St. Peter’s Higher Secondary School, Mawjrong ka la seng ïa ka Past Pupils’ Association ha ka 04 tarik Naitung, 2026, ha ka jingïalang jong ki khynnah pule barim (alumni) kaba la long ha katei ka skul.
Ka jingthmu jong kane ka seng ka long ban pynskhem ïa ka jingïatylli hapdeng ki alumni, ban kyrshan ïa ka skul ha ka jingroi jong ka, bad ban noh synñiang sha ki kam imlang sahlang bad ki kam pule puthi na ka bynta ka bha ka miat jong ka shnong ka thaw bad ka imlang sahlang.
Ki nongkitkam kiba la shah jied ha kane ka seng ki kynthup ïa u Bah Skhembor Myrthong kum u President, u Bah Serofin Kharkongor kum u Vice-President, u Bah Wilfred Mawniuh kum u General Secretary, Bah Robin Star Nongrum kum u Assistant Secretary, Kong Shasha Mary Synrem kum ka Finance Secretary bad Bah Kitborlang Kharkongor kum u Publicity Secretary.
La jied ruh ïa i Kong Barishisha Nongrum kum ka Sports Secretary, Bah Osbornson Kharkongor kum u Assistant Sports Secretary, Kong Lakmen Mary Nongkhlaw kum ka Social Secretary bad Kong Barisuk Nongkhlaw kum ka Education Secretary.
Ha kajuh ka por, u Principal jong ka School, Fr. Anthony Malai bad President jong ka School Management Babu Darius Mawlieh kum ki Ex-Officio Adviser.
Haba ai jingkren ha ka jingïalang, u President uba dang shu shah jied, Bah Skhembor Myrthong, u la pynpaw ïa ka jingsngewnguh ïa baroh ki alumni kiba la wan ban ai ka jingkyrshan bad u la ong ba ka seng kan trei borbah ban pynkhlaiñ ïa ka jingïadei hapdeng ki khynnah pule barim bad ka skul.
“Sngewkmen ban ïoh ban shim bynta lem ha kiei kiei kiba ngi la ïoh ha ki por ba la leit noh bad nga sngewdei ban ai lem ka kti kamon ka kti kadiang sha kiwei pat. Khublei shibun eh ïa ki nongpynïaid jong ka skul, ki nonghikai kiba la trei shitom ban ai jingnang jingstad ïangi,” la ong u President.
Ka Past Pupils’ Association ka khmih lynti ban pynlong ïa ki prokram bapher bapher na ka bynta ka bha ka miat jong ki samla pule, ban pynkhlaiñ ïa ka jingïashim bynta jong ki alumni bad ban kyrshan ïa ka jingroi jong ka St. Peter’s Higher Secondary School, Mawjrong.
Nalor ka jingkren kyntu kynpham na u Principal la ïoh ruh ka jingkren na I Miss Charlene Sawian iwei na ki nonghikai i ba la don bad ka skul la kumba 30 snem ei ei.
Kane ka long katkum ka kyrwoh ba la pyllait da u Publicity Secretary.