Pynksan ka SC ïa ka rai jong ka Meghalaya HC, kyntait ban pyndam ïa ka jamin ka Sonam

By Mawphor Editor On Jul 5, 2026

Shillong, Naitung 4 : Ka ïing Bishar Supreme Court ha ka Sngi Thohdieng ka la pynksan ia ka rai jongka High Court jongka jylla Meghalaya da kaba kyntait ban pyndam noh ïa ka jingai jaminïia ka Sonam Raghuvanshi, kaba la shah kynnoh donkti hakhmat eh ha ka jingpyniap ïa la u kurim u Raja Raghuvanshi ha ka jingleit“Honeymoon’ sha Sohra ha u 2025.
Ka Division Bench kaba kynthup ïa u Justice MM Sundresh bad Sheel Nagu ka la ong, ba ka don ïa ka jingsngew ba hap ban bishar bha halor ka hukum kaba la pynmih da ka Meghalaya High Court ha ka 29 tarik u Jylliew hynrei ka la kyntait pat ban pyndam ïa katei.
Ka ïing Bishar ka la pynpaw ba ka Sonam Raghuvanshi ka dei kaba lah dep ban lait da kaba ïoh jamin bad ka sah hapoh Shillong kumba la bthah da ka ïing Bishar ha ki kyndon ai jamin.
U Nongïasaid Aiñ ne Solicitor General u Tushar Mehta, uba mihkhmat ïa ka sorkar Meghalaya, ula ïasaid hapoh ka ïing Bishar ban pynsangeh shwa ïa ka jingai jamin da kaba pynpaw ba ki jingkynnoh ki long kiba khia bha bad ba ka High Court ka la shaniah ha ki bynta kiba ïadei bad ka laiñ ‘Technical’ ban pyllait ïa ka.
Ka ïing Bishar kam pat sngewhun ban ai ïa kano kano ka hukum. Ka la buh ban bishar biang ïa ka jingkyrpad jong ka jylla hadien jong ka aiom lyiur.
Ka Sorkar Meghalaya ka la mudui ha ka Sngi Palei, hadien ba ka Meghalaya High Court kala pynksan ïa ka hukum kaba la pynmih da ka Session Court ban ai jamin ïa ka Sonam Raghuvanshi.
Ka Sonam Raghuvanshi, kaba shong ba sah ha Indore, ka la shah kem ha u bnai Jylliew 2025 halor ka jingjia kaba ïadei bad ka jingiap u kurim jongka u Raja Raghuvanshi, uba dei u nongkhaïi.
Kine ki shi kurim ki la jah ha ka jingleit kai sha Sohra ha ka 23 tarik u Jymmang 2025 bad ïa ka metiap jong u Raja la lap na kawei ka jaka kaba long riat ha ka 2 tarik u Jylliew.
Katkum ka jingpynpaw jong ki pulit ka Meghalaya, la kynnoh ba ka Sonam ka la ïasuh buit bad thong ïa ki nongpyniap briew ban pyniap ïa u kurim jongka na ka bynta ban ïoh ïa ka spah.