Pan jingbit ki Harijan na ki Pulit ban thaw Valunteer ban ïakhun pyrshah drok ha Them Metor

Shillong, Naitung 3: Da kaba pynpaw ïa ka jingsngewkhia jur halor ka jingroi jong ka jingkhaïi drok bad ka jingkyrni jong ki samla, ka Harijan Panchayat Committee (HPC) ka la pan ïa ka jingkyrshan kaba kyrkieh na ki pulit ban buh ïa ka Youth Volunteer Wing hapoh jongka Section 43 jongka NDPS Act, 1985 ban tehlakam ïa ka jingkhaïi drok hapoh Harijan Colony, Them ïew Mawlong
Ha ka shithi kaba la phah sha u Officer-in-Charge, ka ANTF East Khasi Hills District, ka HPC kala ong, ba ki nongkhaïi drok ki la die pylleiñ pylleiñ ïa u drok ha ka shnong wat hapdeng ba ki la dep ban ai jingujor ha kaba ka la ktah jur ïa ka imlang sahlang bad ïa ka koit ka khiah bad bun ki samla kila sdang ban ngop ha u drok.
“La suba jur ba kine ki nongdie ki dei kiba don da ka jingthmu ban pynngop ïa ki samla jong ka shnong da ka jingthmu kaba sha lyndet ban pynhiar dor ïa ka imlang sahlang ka jong ngi bad ban pynthikna ba ngin ym lah ban ïeng kum kiba don burom bad ki nongshong shnong kiba lah ban shaniah hapoh ka jylla” la pynpaw ka HPC.
Kane ka jingkyntu ka dei hadien ba la dep pynlong ïa ka jingïalang jong ka General Body Meeting kaba la long ha ka 28 tarik u Jylliew, 2026, ha kaba ki nongshong shnong da kawei ka jingmut ki la shim ïa ka rai ban shim da ki sienjam bad ka jingpyrkhing kiba tyngeh da ka jingïarap ki pulit ban ïakhun pyrshah ïa ki nongkhaïi drok.
Ka jingïalang kala rai ban thaw ïa ka “Youth Volunteer Task Team” ka ban kynthup ïa ki nongshong shnong kiba pura kiba ha ka rta 18-35 snem ban ïarap ïa ki pulit ha ka ban peitngor bad ban ai ïa ki jingtip.
Ka HPC kala kyrpad ïa ki pulit ban buh ïa u ophisar ban ai jinghikai ïa ki Volunteers halor ka jingïaid katkum ka aiñ, ki rukom syntiat, ka jingleh kaba shngaiñ bad ban ai ïaki jingtip bad ban ai jingmynjur ïa ka rukom treikam da kaba ai jingsoi ïa ki Volunteer Identity Cards da u In-Charge jongka Police Beat House ban don ïa ka jingïatrei lang kaba ryntih.
“Da kaba sngewrit ngi kyrpad ba ka Section 43 jongka Narcotic Drugs and Psychotropic Substances Act, 1985 ka pynkup bor ïa uno uno u briew ban kem ïa kiba leh kam sniew bad ban aiti ïa u drok ne jingdih be-aiñ sha u ophisar uba la shah pynkup bor hapoh jong katei ka aiñ” la ong ka HPC.
“Halor jong katei ka kyndon, ki samla kiba la ïoh jinghikai pyntbit hapoh ka jingïalam bad jingpynïaid jong ki pulit, kin lah ban long kum ki nongshong shnong kiba don ïa ka jingkitkhlieh ban ïarap ïa ka Tnad Pulit ha ka ban kem ïa ki nongkhaïi bad ban aiti sha ka aiñ”.
Ka committee kala pynthikna ba kan ai ka jingïatreilang kaba pura bad ban bud ryntih ïa baroh ki kyndon aiñ bad ka ong, ba kane ka sienjam ka dei da ka jingthmu “Ban ïada ïa ki samla jong ngi, ban pynneh ïa ka shongsuk shongsaiñ bad ban pynlong ia ka Harijan Colony kum ka shnong kaba lait na u drok na ka bynta ka bha ka miat jong ka imlang sahlang”.
Katkum ka Resolution kaba la mynjur ha ka 28 tarik u Jylliew, la rai ba ka Youth Volunteer Task Team kan treikam hapoh ka jingbtin beit beit jong u SP ka East Khasi Hills bad u In-Charge jongka Police Beat House, 29 Cantonment, Shillong.
Ki Volunteers kin leit ban ïoh ïa ki jinghikai pyntbit na ki pulit hashwa ba kin shim ïa ka bynta ban trei ïa ka kam ka jongki katkum ki kyndon kiba la buh.
Ka kamram jong katei ka kynhun ka long ban ïaid pahara ha ki kynhun kaba don 4-5 ngut naduh ka por 7 baje mynstep haduh 10 baje mynmiet na Shaheed Bhagat Singh Road, ki lynti ïaid paitbah, ki jaka ïew bad ha Syndicate Bus Stand ha ryngkat bad ka jingpyntip mardor ïa kano kano ka jingleh kaba suba sniew sha ka 29 Cantonment Police Beat House bad sha ka Anti Narcotics Task Force. Kane ka kynhun kan pynlong ruh man la ka taiew ïa ka jingleit pynsngewthuh ha man la ki ïing halor ka jingma jong u drok.
Ka HPC ka la pynpaw ruh ba ka paiñkhana paitbah kaba don ha ka shnong ka la kylla long kum ka ktem jong ka jaka dih drok namar ka jingrit palat ka kynroh ïa kaba ïoh ban ïaid lyngba na Lum Survey bad kala kyrpad ïa ki pulit ba kan kynthup ïa katei ka jaka ha ka jingleit ïaid pahara ka jongki.
Ban pynkhlaiñ ïa ka jingpeitngor, ka General Body kala shim ruh ïa ka rai ban kyrpad ïa u MLA ka thaiñ u Bah Adelbert Nongrum, Deputy Commissioner bad ïa ka Shillong Municipal Board ban pyndait ïa ki kor CCTV Camera ha ki 6 tylli ki jaka kiba kongsan bha, hapoh jongka Safe City Project ne Smart City Mission, ha kaba ka HPC ruh kan ïoh ïa ka lad ban khmih ne peitngor lang. Ka Committee kala ong, ba kan pynlut ha ka ban sumar bad ban khmih ïa kine ki kor ki bor bad kan ym don ruh kano kano ka jingpyndonkam bakla ïa ki video.
Halor ka jingujor ba ki don ki briew ki bym sah hapoh ka shnong kiba donkti ha ka ban khaïi drok, ka HPC ka la rai ban ai da ka jingujor ha u SP ka East Khasi Hills bad ha u Officer-in-Charge, Bara Bazar PS, ban phah ban pynshisha bad ban leh ïa kaba donkam katkum ka aiñ.
“Ka HPC ka ïengskhem ha ka ban ai ka jingïatreilang kaba pura ïa ki pulit jongka East Khasi Hills ban pynlong ïa ka shnong kaba lait na u drok, ka ban ïaid beit ryntih katkum ki kyndon jong ka aiñ” la ong ha ka Resolution.
Ka Committee kala kyntu ruh ban shim khia mardor ïa kane ka mat kum kaba donkam kyrkieh bha bad ban lum kloi ïa ka jingïalang ban ïakren ha kaban ai jinghikai pyntbit bad ban shim ïa ki lad ban ïa shim khia lang ban ïada ïa ka lawei jong ki samla.