Ba synjor ka jingkieng ïaidkjat ap jingma ïa ki nongleit nongwan na Lawrynjam sha Parïong

Nongstoiñ, Naitung 03: Ka shnong Lawrynajam kaba hap ha ka Mwathadraishan C & RD Block Eastern West Khasi hills ka dei ka shnong ka ba don kumba sawphew tam ki longïng bad ka dei ruh ka shnong ka bym pat don surok kali satia. Ki paitbah nongshong shnong haba ki leit don kam sha Parïong, Nongshilong bad sha Mairang kaba dei ka headquarter jong ka district ki hap ban leit da ka kjat shaduh Parïong ban shong kali bad kam lyngba kawei ka wah kaba don ïa ka jingkieng ïaid kjat.
Nalor kata man la ka sngi ki khynnah kiba leit skul sha Parïong ki hap ban ïaid na katei ka juh ka lynti bad kam lyngba katei ka jingkieng kaba ha ki por lyiur haba jur bha u slap ka um saw ka tap ïa katei ka jingkieng bad lada dei ha ka por ba ki khynnah ki la wan phai na skul ki hap kim banse ban kam jubor namar ba ki hap ban pynpoi sha shnong namar ka tei ka jaka ka dei ka jaka khlaw.
U Bah K. Marweiñ sordar jong ka shnong Lawrynjam haba ïakren bad u nongthohkhubor u la ïathuh ba ïa katei ka jingkieng ïaid kjat la long jingïarap naduh ka por ba u bah Tuberlin Lyngdoh u dang long kum u MLA hynrei hadien ba u la shah rem kiwei pat ki nongmihkhmat kim shym la ai shuh kano kano ka skhim ban pynbha ne moramot ïa katei ka jingkieng bad ha kine ki snem lei lei ka um ka la bam naduh na sha trai duh jong baroh arliang katei ka jingkieng bad ka shu neh satang malu mala.
U Bah Marweiñ u la ong ruh ba lada mynta u snem ym lah ban moramot tang shu wan u slap lyiur khlem artatien katei ka jingikieng kan twa bad hap shapoh. Ha kajuh ka por u la ong ba ka kaba kham sngewsih ka long ba haba jur bha u slap ki khynnah kiba leit skul ki hap ban pep noh namar kim lah ban kam ïa katei ka jingkieng na shiliang sha shliang.
Khatduh eh u la kyntu ïa ki nongmihkhmat kum u MLA bad MDC jong ka Mawthadraishan constituency ba kin phaikhmat lem sha katei ka shnong khnang ba ki paitbah kin ym jynjar sah kumba ki long mynta.