Nongstoiñ, Naitung, 21: Ka jinglong jingman jong ka Congress ha ki lai tylli ki Constituency ha West Khasi Hills kata ka Mawshynrut, ka Rambrai Jyrngam bad ka Nongstoin ym long shuh ban ïakren, namar ka jingmih noh jong ki nongïalam ba khmat ka la ktah haduh katta katta ïa ka party.
Haba phai ha ka Mawshynrut Constituency ka jingmih noh jong u Bah Sraly Rashir MDC barim jong ka Congress, ka la ktah haduh katta ïa ka Constituency baroh kawei haduh ba lada twad jingmut na kylleng ki shnong bad ki jaka hapoh ka Constituency, ka kyrteng jong ka Congress ka la pjah slam slam lait noh hange hangtai. Katkum ki khubor ba la ïoh lum na baroh sawdong ka Mawshynrut Constituency haduh kine ki sngi ka sur bad ka jingsawa na ki paitbah nongthep vote ka long tang ïa ki ar tylli ki party kata ka HSPDP bad ka NPP.
Katkum ki tyllong khubor ba la ïoh ban lum na ki nongkyrshan jong kitei ki ar tylli ki party kata ka HSPDP bad NPP, la ong ba lada phai ha ka jingnang jingstad bad ka jingshemphang u kyrtong jong ka HSPDP, u la bit la biang bha hynrei u kyrtong jong ka NPP pat wat la u la biang pura ha ka jingdon ïa ka spah ka phew, hynrei ha ka jingnang jingtip te u dang duna bha, ong ki riew rangbah.
Haba pyrshang ban kylli pat la ka Congress kan pynïeng kyrtong ne em ha u 2023 na Mawshynrut, don kiba ong ba tang ban lait na ka jingshah khylliap lama bad ka jingshah pynduh ïa ka party, lada pan tiket da u ba kumno kumno ruh yn ai beit bad ki la ong ruh ba ki nongkyrshan ruh lada shu antad haduh ban da poi ka election 2023 kin dang don palat san hajar ngut.
Haba phai pat sha ka Rambrai Jyrngam la ïoh jingtip ba u bah Golden Nonglong na Nongstoiñ u ba dei ruh u saiantis un ïakhun na ka Congress, namar ba u bah Kimfa S Marbañiang MLA ba mynta u ba la shah suspend na ka Congress un ïaleh noh na ka NPP. Hynrei, ka sur na kiba bun khamtam kito kiba ieit bha bad kiba la pynjop ïa u Bah Kimfa ha Rambrai, ki la ong ba ka NPP kan sar naphang bad don ruh kiba ong ba kan jop kput ha u 2023.
Haba phai pat sha ka Nongstoiñ ka Congress ki don ki katto katne ki briew na ka party NPP ki bym kwah pynpaw kyrteng, hynrei ki la kam ba kumba long mynta, kane ka party kaba don ïa u bah Gabriel Wahlang u ba long u MDC. Hynrei ki la ong ba ka jingmih pyrthei jong u bah Macmilan Kharbani kum u kyrtong na ka Trinamool Congress, ka la pynduh jingkyrmen namar kiba bun ki nongïalam jong ki Prmary Unit ki la leit pynïasoh noh sha ka TMC, ban ai ka jingkyrshan ba pura ïa u bah Macmillan Kharbani. Ka sur haduh mynta hi ka long ba ha baroh lai Constituency, ka NPP kan jop suk jop saiñ khlem jingeh.
