Shillong, Naitung 21 : Ka Langsning FC ka la lait mad nam rem ha ka Ryntih SC hadien ba u Shano Tariang u la thep ïa ka kol pynïakhaid ha ka jingïakhun ha ka sngi Palei jong ka lympung OC Blue Shillong Premier League 2021-22 ha madan Third Ground, Polo, Shillong.
Lyngba katei ka jingïakhaid ka Langsning FC ka la kiew sha ka kyrdan ba ar na ka miej kheiñ point kaba don phra tylli ki club da kaba khur 11 point.
Haba phai sha ka jingïakhun hapdeng kine ki ar tylli ki club, ka jingïakhun ka long kaba mar ïabam ha ka liang ka jingpynsmiej thep kol, hynrei dei ka Ryntih kaba la ïoh ban plie pyrda nyngkong ba la thep da u Dawanchwa Challam ha ka jingïalehkai ba dang ïaid hynñiew minit.
Lyngba katei ka shi kol ka jingïakhun ka la nang shongshit bad nang ïakhaid. Ki rangïalehkai ka Langsning hadien ba ka la shah thep, ki la ïakhun tyngeh bad ñion beit sha ka kut jong bad pynsmiej ruh bunsien ïa u rangap kol.
Da ka jingïai pyrshang bunsien, khatduh ka Langsning FC ka la ïoh ban pynïakhaid lyngba u Shano Tariang uba la thep ïa ka kol kaba itynnad bha ha ka minit ba 24.
Na ka jingïathep ba mar shikol, ka jingïalehkai ka la sdang ban ïakhluit ha kaba ki rangïalehkai jong baroh ar tylli ki team ki la pyrshang da ki lad ki lynti ban ïoh pynphai kol hynrei haduh kaba kut jong ka kylla step ka jingïathep kol ka long da mar 1-1 kol.
Haba wanphai sha ka jingïalehkai jong ka kylla miet, ki ar kynhun ki la pynkhlaiñ bad bujli rangïalehkai ruh. Hapdeng ka jingïakhun kaba itynnad bha, kine ki ar tylli ki khlem lah shuh ban ïathep kol ha kaba ka jingïalehkai ka la kut noh da kaba ïasam mar shi point.
Nalor ka Langsning kaba don ha ka kyrdan ba ar, ka Mawlai SC kadei ka kynhun ba khlaiñ tam ha kane ka samoi ba mynta kaba bat ruh ha ka kyrdan ba nyngkong da kaba khur 16 point na ki hynriew sien ïalehkai.
Ka wat ïalehkai ba hynñiew jong ka SPL kan sdang ha ka sngi Saitjaiñ ha kaba ka lahduh ka Shillong Lajong FC kaba don ha ka kyrdan ba hynriew kan aireng pyrshah ïa ka Malki SC kaba don ha ka kyrdan ba hynñiew. Baroh ar tylli ki team ki khur mar 4 point hynrei ka Shillong Lajong ka lamkhmat na ka jingïapher ha ka rukom ïathep kol.
