Shillong, Jylliew 26: Ka seng Voice of the people’s party (VPP) ha ka sngi Palei ka la lum ïa ka jingïalang jong ki MDC ha Nongkrem ha kaba u President Rangbah ka seng u Bah Ardent Miller Basaiawmoit u la ai khublei kyrpang ïa ki MDC kiba la lehbha bad trei shitom ha ka Session baladep.
Ki tyllong khubor ki ïathuh ruh ba ha kane ka sngi ka la don ka jingïaphylliew jingmut halor ka jingmih ki hamsaia ba kam don ka jingïasngewthuh jingmut hapdeng ki MDC bad kumjuh ruh ka jingiehnohkam EM u MDC Mawkyrwat.
Ha kane ka jingïalang la don lut baroh ki MDC lait noh i MDC Mylliem iba don hapdeng ka met bym shait bym khlaiñ.
Kane ka jingïalang ka pynpaw ba kam don kano kano ka jingsynjor ha ka liang synshar jong ka VPP bad pynpaw ruh ba baroh ki MDC ki skhem bad tylli beit mlon ban ïatrei khambha shuh shuh ha KHADC bad ban nang pynkhlaiñ shuh shuh ïa ka Party.
Ha kane ka sngi na ka liang jong u President u la kyntu ïa ki MDC ba kin nanglah ban trei kham bha shuh shuh ha kane ka kynti na ka bynta ka jingdonkam jong ki jaitbynriew kiba donkam bha ban wanrah ïa ka jingkylla.
Kumba ka long mynta u la ong ba bun na ki briew ki kwah shisha ïa ka jingkylla bad ba kum ka seng ka mad ïa ki jingshah tynjuh kiba na ka por sha ka por, hynrei yn hap ban ïai shah naba kane ka dei ka kam kaba kongsan.
