Pynkha ka BJP ïa ka Mandal ba pura ha Mawlai, buhthong ban pynleit jingmut ha ki skhim sorkar pdeng

SHILLONG, Jylliew 26: Ka Bharatiya Janata Party (BJP) ha ka sngi Thohdieng ka la pynkha ïa ka Mandal ba pura ha ka 15-Mawlai, ha kaba ki nongïalam ki la ong ba kane ka sienjam ka thmu ban pynthikna ba ki nongshong shnong ka constituency ki ïoh kham bha ïa ki skhim jong ka sorkar pdeng.
Kane ka jingioh ban thaw ïa ka Mandal hapoh Mawlai Constituency kadei lyngba ka jingtrei shitom jong u nongai ktien jong ka BJP u Bah M Kharkrang.
U Bah M Kharkrang u la ong ba ka party ka kmen bad sngewhun ban pynkha ïa ka Mawlai Mandal.
“Kito kiba ba wan ïasoh mynta ka sngi ki dei na kiwei pat ki party ha ki por ba la leit.Hadien bun snem ba ki jingeh ki bym pat lah ban pynbeit bad ka jingïasyllok kaba bniah, ki la ong katto lah biang lah biang, kiwei pat ki constituency ki la ioh jingmyntoi, te balei pat ka Mawlai kan shah pynduh” ong u Bah Kharkrang.
U Bah Kharkrang u la pyntip ba u Bah Synsharlang Maiong un khlieh ïa kane ka Mandal kaba don 36 ngut ki dkhot.
“Ma u bad ka kynhun jong u kin poi sha ki jaka ba jngai jong ka Mawlai ban pynsngewthuh ïa ki briew halor ki skhim pynroi kiba lah ban ïoh, khamtam kito kiba ai jingmyntoi ïa ki longïing kiba duk bad kiba duna ka ïoh ka kot,” ong u Bah Kharkrang.
U Bah Kharkrang u la ong, “Ïehnoh shwa sharud ïa ki surok – kita kin sa wan – ki don bun kiwei pat ki skhim kiba ktah ïa kawei pa kawei ka long ïing.”
U Kharkrang u la ong ba ka jingthmu jong ka party ka long halor ka roi ka par ban ïa ka sain pyrthei.
“Napdeng ka election, ngi kwah ba ki paidbah ka Mawlai kin kiew shaphrang bad ban ïaid ryngkat bad kiwei, palat 30 ngut ki la ïasoh mynta ka sngi, da kaba don 36 ngut ki dkhot naduh u President haduh ki Executive Member, mynta ngi la don ïa ka Mandal kaba pura, ka sienjam kaba bud ka long ban thaw ïa ki booth committee”, u la ong.
U President ka Mawlai BJP Mandal u Bah Synsharlang Maiong u la ong ba ka rai jong u ban pynïasoh sha ka BJP ka dei namar ka jingbym don jingmih na ki jingiasoh sain pyrthei kiba kham mynshwa bad ka jingdkoh ha ka jingpynpoi ïa ki skhim.
“Ngi la iatreilang bad ki seng bapher bapher ha kine ki snem, hynrei ngim shym la iohi ïa ka jingmih kaba bha”, la ong u Bah Maiong.
Shuh shuh u Bah Maiong u la ong, “Ki skhim jong ka sorkar pdeng ki poi sha ki konstitwensi, kynthup ïa ka Mawlai, hynrei bun ki nongïoh jingmyntoi kiba dei hok hangne kim ïoh ïa ki namar ba ym don mano mano ban pyni lynti ban ïoh ïa ki.Ngim lah ban kam ba baroh ha Mawlai ki ïaid bha; bun ki dang donkam ïa ka jingïarap bad jingkyrshan.”
U Maiong u la ban jur ba ïa kino kino ka rai ngi donkam ban ïa shim lang.
“Ngim shym la leh kyrkieh, hadien ba ngi la ïa pyrkhat sani bha bad ki paralok, da kawei ka sur ngi la shim ïa ka rai ba ka BJP ka lah ban ïarap ïa kiba duk ha Mawlai, dei na kata ka daw ba ngi la pyniasoh bad thaw ïa ka Mandal”, u la ong.
Ka BJP ka la pynmih ïa ka jingpynbna ba la thoh ïa ka kyrteng jong ki 31 ngut ki nongkitkam na ka bynta ka samoi treikam 2026-2028.
Nalor u President jong ka Mawlai BJP Mandal, kane ka kynhun ka kynthup ïa lai ngut ki Vice-President, arngut ki General Secretary, lai ngut ki Secretary, uwei u Treasurer, bad 20 ngut ki Executive Member.
Ha kawei pat ka liang, u City Secretary barim jong ka Rashtriya Swayamsevak Sangh u Homnath Gautam u la rung sha ka BJP ha ryngkat bad ki paidbah nongkyrshan na West Shillong.