Ngam don por ban sngap ïa kiba kynthoh ne ïaroh; nga pyrkhat tang ïa ki kam ban pyntyllun shakhmat: Nonglait

Mawkyrwat, Jylliew 23: Ka National People’s Party (NPP) Mawkyrwat Block Committee mynta ka sngi, ka 23 tarik u Jylliew 2026, ka la pynlong ïa ka jingïalang paidbah (Public Meeting) ha Kper Kong Mon, Ïew Mawkyrwat, South West Khasi Hills District, kum shibynta ban pan ïa ka jingkyrshan paidbah na ka bynta u kyrtong ka party, u Dr. D.R.L. Nonglait u ban ïakhun ha ka MP Election Shiteng Samoi na ka Shillong Parliamentary Constituency.
Haba kren ha ka jingïalang paidbah, u Dr. D.R.L. Nonglait u la ong ba um don por ban sngap ne pynleit jingmut ïa kiba kynthoh lane kiba ïaroh ïa u, hynrei u pynleit ïa ka jingmut ban trei shitom halor ki kam kiba donkam ban pyntyllun na ka bynta ka bha ka miat jong ki paidbah bad ka roi ka par jong ka jylla lada ki paidbah ki ibit ïa u ban pynjop ha kane ka MP Election ba mynta.
Shuh shuh ha ka jingkren jong u, u la pynpaw ruh kum u kyrtong uba sa ïa khun ha kane ka MP Election u jied ïa kane ka party da kaba u la pynshong nongrim bha halor ki kam ba ka ka la pyni sha ki paidbah da kata ka lynti, kum u kyrtong u la buh ruh ki kyntien phira na ka bynta ban shakri ïa ki paidbah bad kiba long ha kajuh ka por ki mat kiba kongsan kita ki long “ban pynbha, ban pynshai bad ban tei” ha kaba kine ki kit jingmut, ban pynbha nyngkong eh ïa ka longbriew manbriew, ïa ka imlang ka sahlang, ka synshar ka khaddar, ïa ki shnong ki thaw, bad ïa ka ri ka jaidbynriew, ban pynshai ïa ki jingpynsngewthuh bakla, ban pynshai ïa ka jingdum ka synïa bad ban tei ïa kaba la jot ba la pra la ka long ha ka imlang ka sahlang lane ha ka synshar ka khaddar.
Ym tangkata, u la pynsngew ruh ba u don ruh ki mat ki jura naduh ba ym pat shym la pynïasoh bad kane ka part NPP ha ka ban ïakhih ban pynithuh noh ïa ka ktien khasi kum ka ktien sorkar hapoh ka Jylla Meghalaya. Kumta u la buh ka jingkyrpad ïa ki paidbah jong ka Mawkyrwat Constituency bad Ranikor Constituency ba kin ai lem ka kti ka mon ban pynjop ïa u Dr. D.R.L. Nonglait ha kane ka MP Election khnang ba kan pynsuk ïa ka jingïakhun ban pynrung noh ïa ka ktien khasi ha ka 8th Schedule ne Khyrnit kaba Phra, ban kyntiew ïa ka pule puthi, ban kyntiew ïa ka rep ka riang, ki kam pynroi lyngba ki karkhana rit, ki kam pynroi lyngba ki C&RD Block bad kiwei de ki kam pynroi na ka bynta ka jingmyntoi jong ki paidbah.
Shuh shuh ha ka jingkren jong u u la pynpaw ruh ba ban shakri ïa u paidbah ka long kaba donkam eh ban shakri da ka jingieit ym da ka mynsiem jong ka jingdom, ka jingïabeiñ, ka jingkynnoh, ka isih, ka shun, ka pen, ka bishni, ka pihuiñ namar kine baroh kim wahrah ïa u soh uba thiang ha ki jingïaleh.
Kiwei de kiba la donlang bad kiba la ai ki jingkren ha kane ka sngi ki kynthup ïa u Dr. Celestine Lyngdoh, MLA ka Umsning, u Bah Hamletson Dohling, MLA barim bad kum ki nongaibuit ka Sorkar Meghalaya, bad u Bah Enbin Kharaswai, MDC barim, kiba la ban jur halor ka jingdonkam ban ai ka jingkyrshan kaba pura ïa u kyrtong ka NPP ha kane ka election.
Shuwa ban sdang ïa ka jingïalang, la pynlong ïa ka jingduwai da u Bah Working Sangriang, bad ïa ka jingïalang la pynïaid da u Bah Carness Sohshang, President ka NPP South West Khasi Hills District bad jingkren khublei na u bah S.K. Budnah.