Kyntait ka Sitharaman ba “pynkjeh” ïa ki jylla hynrei yn bteng ban ïarap pisa tad haduh ba kin da kiew ha baroh ki liang

Shillong, Jylliew 20 : Ka Myntri kam pla pisa jongka sorkar pdeng ka Nirmala Sitharaman ha ka jingwan sha ka nongbah Shillong ka la kyntait ïa ka jingkynnoh ba ka sorkar pdeng ka pynkjeh ïa ki jylla da ka jingtheh pisa ban ïarap ïa ki ban kiew bad roi namar ka la ong ba ka sorkar pdeng kan ïai bteng ban theh ki jingïarap pisa sha ki jylla tad haduh ba kan da ïohi ba ki la kiew ha baroh ki liang bad ki la lah ban ïeng ha la ki jog ki kjat.
Haba kren sha ki lad pathai khubor halor ka jingïarap ban ïoh pisa na bar ri ban tei ïa ki projek ba heh ha ki jylla kane ka thaiñ ka Sitharaman ka la ong haduh katno ka sorkar pdeng kan lah ban theh jingïarap na ka liang jongka ïa ki jylla lada ym thaw lad ba kin ïoh ban shim ram na sha bar ri.
“ Ha kaba nyngkong eh halor kine ki jingïarap ngam kwah ban don kiba kynnoh ne pyndonkam ïa ka kyntien ‘Pynkjeh”. Nga kwah ban ïohi ba kawei pa kawei ka jylla kin kiew na kine ki jingplie lad plie lynti ka sorkar pdeng bad kane ka dei ka rai ba la shim da u M yntri Rangbah duh ka ri ban ïarap ïa ki jylla” ong ka Sitharaman.
Ka la batai ba ki skhim kum ka SASCI ki dei kiba hap siew haduh 50 snem khlem kano kano ka sut bad kane ka rai la shim da u Myntri Rangbah duh hadien ka khlam COVID khnang ba ki jylla kin khyllie pat na ka jingduh nong.
Kane kam dei ka jingai jingmut jongka Finance Commission hynrei ka dei ka rai jong ka ophis u Myntri Rangbah duh ban kyrshan ïaki jylla ba kin kiew kin roi kin par. Na kata ka daw la ai ïaka skhim SASCI kaba ym donkam ban siew sut haduh 50 snem lynter.
Ka la kren shai ba kane kan ïai bteng tad haduh ban da ïohi ba ki jylla ki la biang bad donkam sa malu mala ba kin leh hi ïa ki kam ki jam.
“Nga sngewtynnad ba ki don kiba kylli haduh lano phin bteng ban leh ïa kane? Ngan ong ïa phi ngin bteng tad haduh ban da ïohi ba ki jylla ki la biang nadong shadong naduh ki surok ki lynti ki syngkieng, ki skul, ki hospital bad kiwei kiwei ki jingtei na ka bynta ban ai jinghikai ha kiba bun ki liang” ong ka Sitharaman.
Kane ka jingailad ïa ki jylla kane ka thaiñ ban ïoh jingïarap na shabar ri ka la wanrah ka jingkylla kaba khraw bad halor kane ka sorkar pdeng kan siew ïa ka ram 90% bad ki sorkar jylla kinsiew tang 10 %.