Shillong, Jylliew 22 : U Symbud Myntri Rangbah ka Jylla, Bah Prestone Tynsong ha kane ka sngi Nyngkong u la leit ban jurip ïa ka surok Shillong – Dawki kaba dkut hi thui ha ka miet sngi U Blei harum ka shnong Laitlyngkot kaba la wanrah ïa ka jingdkut syndon ka leit ka wan naduh Laitlyngkot sha Pynursla ter ter shaduh Dawki.
Haba kren bad ki lad pathai khubor hadien ka jingjurip, u Symbud Myntri Rangbah u la pynpaw ba ki la ïohi ba ka jingjulor ka la jubor bha bad kumta kan shem jingeh ba yn lah ban pyndep ne shna thymmai ïa katei ka surokbah. Kumta halor kane u la ong ba kin sa hap ban shong pyrkhat bha ban wad ïa kiwei pat ki lad ki lynti khnang ba ka leit ka wan jong ki paidbah kan ym shah ktah palat.
Shuh shuh u la ïathuh ba hadien ka jingjurip ki la ïohi ba katba ka jingshna ïa katei ka surok ba twa ka dang ïaid ki lah ban pyrshang pynïaid noh shipor ïa ki kali rit bad ki kali ba kit sting lyngba ka surok Umthli sha Iew Mawiong ter ter sha Nongthymmai bad mih pat sha ka parmaw jong i Bah Khrik.
“Ngi la ïaid mynta bad ngi ïohi ba ka lah ban long ban pyndonkam na ka bynta shipor arpor tangba ka dei na ka bynta ki kali rit bad kam dei satia ïa ki kali kamai. Ïa kane ngin sa ïa shong bad ki ophisar baroh kynthup naduh ki bor distrik, ka PWD, NHIDCL ba ngin ïoh ban pynbeit kumno ban leh ïa kane ka kam,” u la ong.
U Symbud Myntri Rangbah u la ong ba na bynta kane ka mat kin hap ban ïa trei lang bad ki bor shnong kumjuh ïa ki trai jaka ban ïoh pyndonkam ïa kane ka surok katba ym pat lah ban pyndep ïa katei ka surok ba ba dang shna thymmai kaba la dkut syndon.
Ha kane ka jingleit jurip la donlang naduh u MLA ka Sohra Bah Gavin Mylliem, u Deputy Commissioner ka East Khasi Hills Abhilash Baranwal, Superintendent of Police ka East Khasi Hills Bah Vivek Syiem, ki ophisar ka PWD, nangta na ka NHAI, NHIDCl bad kiwei kiwei.
