Ka jingwan u Thomas Jones ka pynïatylli ïa ka jaidbynriew: MLA Nongstoiñ

Nongstoiñ, Jylliew 22: Kum shibynta jong ka jingpyrshang ban nang kyntiew bad pynphriang shuh shuh ïa ka jingnang jingstad, ka Skul Thomas Jones 1 Secondary School kaba don ha ka shnong Pyndengrei Nongstoiñ, West Khasi Hills, ha ka sngi nyngkong ka 22 tarik u Jylliew 2026, ka la plie ïa u mawnongrim na ka bynta ban plie noh ïa ka Higher Secondary jong ka Skul.
Ka jingplie ïa u mawnongrim na ka bynta ka Higher Secondary jong ka Thomas Jones 1 School, ka long ruh kum shibynta ban rakhe ïa ka sngi ba kyrpang jong u Thomas Jones u ba long ruh u kpa ki dak thoh alphabet Khasi.
U kongsan u ba la donlang ha kane ka sngi ban plie u dei u MLA ka Nongstoiñ Bah Gabriel Wahlang. Haba ai jingkren kum u kongsan, u Bah Gabriel Wahlang u la ong ba ka sorkar na ka por sha ka por ka la pyrshang katba lah ban leh bha ïa baroh ki skul katba don ka buit ka bor baroh na ka bynta ban kyntiew shuh ïa ka pule dangle hapoh la ka jong ka Jylla.
U la ong ruh ba ha kaba ïadei bad ki Adhoc grant ka la kham eh mynta, namar ba ka sorkar ka dang pynkhreh ban pynbeit ïa ki kynrum kynram hapoh ka tnad pule puthi, da ka jingthmu ban pynbha ïa ka education policy bad hangta yn sa lah ban sdang biang ïa ki Adhoc grant.
Ha kaba ïadei bad kane ka sngi jong u Thomas Jones, na ka liang jong u Bah Gabriel u la ong, “U Thomas Jones u wan sha kane ka Ri Khasi ban pynïatylli ïa ngi lyngba ka jingpynïoh ïa ngi ka jaidbynriew Khasi ïa u dak thoh alphabet bad ïa ka ktien Khasi”.
Ha kaba ïadei pat bad ka jingplie ïa ka Higher Secondary jong ka Skul, na ka liang u MLA u la kular ban ai jingïarap song pisa na ka MLA skhim ka jong u.
Ha kane ka jingïalang plie ïa u mawnongrim la sakhi da ka jingïadonlang ruh u Tbn C.Rani, Tbn T.Lyngdoh, kong B. Marweiñ Principal, ki dkhot ka managing committee jong ka Skul, ki nonghikai ki khynnah skul ki kmie ki kpa bad kiwei kiwei.