Jylliew 20: U Lamine Yamal um pat sngew koit 100% bad la khmihlynti ba um pat lah ban sdang na ka bynta ka jingïalehkai jong ka Spain pyrshah ïa ka Saudi Arabia ha kane ka sngi U Blei (por 9:30 janmiet) ha ka World Cup.
U Yamal u la rung sha kane ka lympung ryngkat ka jingmynsaw bad u la mih madan tang kum u nongbujli ha ka jingïalehkai ba sdang jong ka kynhun ha ka sngi Nyngkong, ka jingïakhaid kaba pynduh jingkyrmen pyrshah ïa ka Cape Verde da 0-0.
“Nga’ biang, nga sngew shait, hynrei ka dang kloi palat,” la ong u Yamal. “Kam long kaba donkam (ban shim ïa ki jingma). Nga dang ïaid lyngba ka jingpynkylla dur, kam pat dei ka por ban ïalehkai pura haduh mynta. Hynrei nga lah ban ïalehkai katba kwah u coach.”
U Yamal uba dang 18 snem ka rta, u la mih na ka ben shong ha ka minit kaba 71 pyrshah ïa ka Cape Verde hynrei um shym la lah ban pynkhihwin na ka bynta ka Spain ban jop pyrshah ïa ka ri kaba don kumba shiteng lak ngut ki briew kaba dang ïalehkai ha ka sien ba nyngkong ha ka World Cup.
Hadien ka jingïakhun pyrshah ïa ka Saudi Arabia ha kane ka Sngi U Blei ha Atlanta, ka Spain kan leit sha Guadalajara ban ïakhun pyrshah ïa ka Uruguay ha ka jingïakhun kaba kongsan tam jong ka Group H. Kane ka jingïakhun ka lah ban long kaba rai ïa kiei kiei bad ban don ïa u Yamal ha ka met kaba koit pura ka lah ban long kaba kongsan bha ïa ka Spain.
U Yamal u la ong ba u paralok jong u, u Nico Williams, uba la wanpoi ruh ryngkat ka jingmynsaw bad hapdeng ka jingshah sumar, u la kham hakhmat ïa u ban ïoh ïa ka jingkoit jingkhiah kaba pura.
“Ha ka bor met u kham shait wat ban ïa nga,” la ong u Yamal. “Ngim don ha ka jingkyrkieh. Ngi don ka kynhun kaba tbit bha bad ki nongialehkai kiba kynsai bad ngi hap ban ïaid kawei hadien kawei.”
U Yamal u la wanpoi sha ka World Cup kum uwei na ki khlur ïalehkai ba pawnam jong kane ka lympung watla u dang rit ka rta. U la kiew bha ka nam ryngkat ka Barcelona bad ka kynhun ïalehkai ka ri jong ka Spain la katto katne por, hadien ba u la ïarap ïa ka Spain ban jop ïa ka European Championship ha u snem 2024. U la ïalam ïa ka Barcelona ban jop ïa ka nam lahduh jong ka La Liga ha kane ka samoi ba la dep.
