Wanrah ka KHADC ïa ka Mang tyngka kaba 214 klur na ka bynta u snem 2026-2027

Shillong, Jylliew 17: Ka Khasi Hills Autonomous District Council (KHADC) hapoh ka jingialang jong ka Voice of the People Party (VPP) kaba ïalam ïa ka Executive Committee kala wanrah ïa ka mang tyngka kaba T.214, 60, 09, 410 klur jong u snem 2026-27 ha ka Dorbar lyiur ba sdang ha ka sngi Nyngkong.
Kane ka mang tyngka ba la wanrah da ka KHADC mynta ka sngi hapoh ka ïing dorbar thaw aiñ kadei kaba duna T.16.92 lak jong u snem 2026-27.
Kat kum ka jingong u Executuve Member ka tnad Finance Seiborlang Warbah, ka ka jingmang pynlut ka long T.214, 60, 09, 410 bad ka jingpynmih pisa ka long T.214, 43, 16, 760.
Haba kren halor kane ka mang tyngka u Bah Seibor u la ong,”Nga kular ba kane ka Executive Committee kan ym sangeh ban wad ïa ki lad ki lynti ha kaban pynkiew ïa ka jingpynmih pisa jong ka Council, pynjanai ïa ka rukom treikam bad bishar bniah bha ïa ka jingpynlut khnang ba kan long kaba ïaid beit”.
U la ong, Kumba ngi ïa tip lang baroh ba ka Vote on Account na ka bynta (3) lai bnai kan kut noh ha u bnai Jylliew, kumta la wanrah ha khmat ka ïing ïa ka mang tyngka ba pura jong u snem 2026-2027 khnang ban pyniaid ïa ka synshar khaddar jong ka Council.
Shwa ban jam sha ka jingmang tyngka ba pura, “Nga sngewbha ban pyntip ïa ka ïing baroh kawei ba ka Executive Committee kala shim ïa ki sienjam ban buh da ka kyndon halor ki jaka ka Raid hadien ka jingshem ïa ka jingnang lut ki jaka ki Raid lyngba ka jingai sha ki riew shimet bad ki kompani, kaba la iaid da ki phew hectare.Kane ka buh ha ka jingma ïa ka lawei jong ki longdien mandien ban ioh jaka ban rep ban riang ne ka jaka shong jaka sah ïa ki khun ki hajar jong ka Raid khamtam ïa ki duk ki suk”.
Kumta ban ker ban ïada ïa ki jingai jaka pathar ïa ki jaka Raid bad ban pynneh pynsah na ka liang ka Executive Committee ka lah rai ban buh kyndon noh ha kaba ïadei bad ka jingheh ban ai bynta ïa ki jaka Raid da kaba wanrah ïa ka jingpynbna.Kane ka jingpynbna kan treikam mardor hynrei kan ym treikam ia ki jaka bala thied da ka Sorkar Pdeng bad Sorkar Jylla u la ong..
Ka KHADC kala i donkam ïa u Land Recording Officer uba proh bad uba shemphang ha ka Geographic Information System (GIS) ban pyntreikam ïa ka Digital India Land Record Modernization Programme (DILRMP) bad ka KHAD (Regulation and Administration of Land) Act, 2021, ka council ka donkam ruh ïa ki briew kiba tbit ha ka GIS bad survey technology khnang ba yn pyntikna ba ki record kin long kiba pura, u la ong.
Halor ka jingpynmih pisa, u Bah Warbah ula ong ba ka Executive Committee kala pynlait ïa ka kot lyngkdop (pamphlet) katkum ka “Meghalaya Professions, Trades, Callings and Employment Taxation Act, 1947”.
Halor ka song pisa na ka Sorkar Pdeng, ula pynpaw ba ka 16th Finance Commission kala mang T.1,479 klur ia ka Meghalaya Rural Local Bodies naduh u snem 2025-26 haduh 2030-31, bad ka bhah ka KHADC jong u snem 2026-27 ka long T.85.50 klur ka ban phiah sha ka Basic bad Performance Grant ba 80:20.
U bynrap ba ka Coyncil ka dang ap ban ioh sa T.12.15 klur hapoh ka installment kaba ar jong ka 15th Finance Commission Untied Grant 2022-23.
U Bah Warbah ula pyntip ruh ba ka Council kala iasoi ia ka MoU bad ka IORA Ecological Salution Pvt na ka bynta ki kam thungdieng ne pynrben biang ia ki khlaw bad ki carbon project.
Shuh shuh u la pyntip ba ïa ka Khasi Hills Autonomous District Council Member Pension Repealing Act 2026, la ioh pdiang ïa ka jingmynjur jong u Lat ka jylla bad lyngba kane ka aiñ kumba la mynjur lang da ka ïing baroh kawei kan nang ïarap ban tyngkai shuh shuh ïa ka pisa jong ka Council.
Ha kaba iadei bad ka jingpynlut u EM u la kdew na ka bynta ban kyntiew ïa ka jingsiew jong ki Casual nalor kiwei pat.