3 bnai yn shim por ban buddien ka Sorkar jylla bad Sorkar pdeng, sangeh shwa ka jingshah thngan: Dy CM

Shillong, Jylliew 17 : U Symbud Myntri Rangbah ba dei peit ïa ka tnad kam Pohïing ka jylla u Bah Prestone Tynsong ula kyntu ïa ki nong ïakhih ba shong shah thngan ha East Jaintia Hills halor ka kam tih dewiong, ba kin pynkut noh shwa ïa ka jingïakhih bad ban wan ïakynduh ïa ka Sorkar, namar ka sorkar ka la dep pynpaw sha ki kynhun bapher bapher ba kin “ap lai bnai” katba ka dang buddien ban ïoh jingpynjynsur na ka Sorkar Pdeng.
“Ha ka jingshisha, ka Sorkar, lyngba u Myntri Rangbah ka Jylla, ka la dep kular ïa baroh ki kynhun ba don bynta ha ka kam, ‘Sngewbha ap lai bnai’. Ka Sorkar kan pyrshang ban buddien bad ka Sorkar pdeng bad kan pyrshang ruh ban ïoh ïa ka jingmynjur ban pynjynsur na ka Act kaba long mynta” ong u Bah Prestone. Haba kren shaphang ki nongshah thngan, ula ong “Namar kata, nga kyrpad ïa ki briew kiba dang ïashong shah thngan, ha ka jaka ban shah tngan, wan ïakynduh ïa ka Sorkar, ïakynduh ïa u Myntri Rangbah bad pan ïa ka jingpynshai. Nga tharai kane ka long kaba kongsan. Kam mut ba phin leit shong shah thngan bad phin ïoh ïa kaei kaba phi kwah”.
U DyCM ula bynrap ba ka Sorkar Jyla ka dang wad ïa ka lynti ban pynbeit ïa kane ka jingeh kaba jwat bha, kaba la pynkha da ki kyndon tih par ba mynta.