Nongstoiñ, Naitung 20: Ki nongïalam jong ka WKSU Nongstoiñ Circle ha ka sngi balang jong ka taiew, ki la leit ban ïakynduh kyrpang ïa u E.E ka tnad MePDCL bad ïa u SDO Nongstoiñ, halor kumno ban pynbha shuh shuh ha ki rukom treikam na ka bynta ki jingmyntoi ki paidbah ka thaiñ.
Ha katei ka jingïakynduh, la ai jingmut ïa ki heh katei ka tnad ban pynlong da ka awereness program, halor ka jingpyntreikam ïa ki smart meter ba thymmai, kata naduh ïa ki rangbah shnong, ki sengbhalang, ki seng longkmie bad kiwei kiwei ki kynhun treimon sngewbha, khnang ba ha shuwa ka jingpyndait ïa ki smart meter kin long kiba shai bad khlem jingartatien, hakhmat ki paidbah nongthang lait.
Ka seng ka dawa na katei ka tnad ba ha khlieh duh ka jylla ka MeCL, ba ka dei ban siew noh kloi ïa ki bill ba dang sah teng jong ki contractor kiba pyntrei ïa ki laiñ bording bad kiwei kiwei ki kam hapoh ka thaiñ.
Ka tnad bording ba ha khlieh duh ka dei ban mang tyngka kham kylluid mynsiem ha kaba ïadei bad ka jingshim wai ïa ki kali paidbah kali pickup lane Bolero camper, namar katkum ka jingshem jong ka seng na ki jingsngew ki trai kali kiba ai wai sha katei ka tnad ka long ka bym ïahap satia.
Ka dor bad ka kamram ban kit ban bah ka ïa pher bak ly bak na ka jingsiew bnai ïa ki trai kali. Bun na ki trai kali bunsien ki hap kynran dien noh, namar ka long thik kumba leit pyntrei ei pynkit ei na ka bynta katei ka tnad kaba don ha Nongstoiñ. Kane ka jingbuh dor ka long thik kumba shu pyndonkam ïa ki trai kali.
Ka dor bai wai kali ïa mynta ka long 22,500 shi bnai kumba la pynpaw da ki heh jong katei ka tnad jong ka thaiñ. Ha kaba ïadei bad kane, ka seng ka dawa na ka MeCL ba ha khlieh duh ka jylla, ban phaidien biang ha kaba ïa dei bad ka dor ka mur ban shim wai kali na ki paidbah, khnang ban ïoh jingmyntoi lang.
Ka seng ka ai jingmut ïa ka shlem treikam ba ha khlieh duh, ba la kumno kumno ka dor ban ïa myntoi lang, dei ban pynkiew noh na ka 22,500 sha ka 30,000 haduh 35,000, na ka bynta kawei ka kali ban ai jingshakri ïa ki paidbah ha ka thaiñ West Khasi Hills.
Ki nongïalam jong ka seng hapoh ka ka jingïalam u samla Banshanlang Syiemlieh secretary jong ka WKSU Nongstoiñ Circle, ki la pynpaw bad ai jingmut shibun bah ïa ki heh jong katei ka tnad jong ka thaiñ, kumba ki la pynpaw ïa ki juh ki jingeh kaba ki ïakynduh. Na ka liang ka seng kan sa buddien na ka bynta ka bha ka miat jong katei ka tnad bording na ka bynta ki jingdonkam ki paidbah ka thaiñ, ong ka kyrwoh khubor.
