Lahduh u Shemladbha Khongwir bad Angelis Kharumnuid ha ka Arm Wrestling ka Sankardev College

Shillong, Naitung 20 : U Shemladbha Khongwir (60kg) jong ka Seng Khasi Collece bad ka samla Angelis Kharumnuid (50kg) jong ka Shillong College ki la ïoh rah ïa ka nam lahduh ha ka rynsan ïakhun kti (Arm Wrestling) ba la pynïaid da ka Sankardev College. Ka Sankardev College ha ka sngi Balang (20-07-2022) ka la pynlong ka jingïakop ïakhun kti ne ka Arm Wrestling kum shi bynta ban rakhe ïa ka jingdap 60 snem (Diamond Jubilee) ka jingïaid lynti jong ka College ban shakri ha ka liang ka pule puthi.
Ïa katei ka rynsan ïakhun kti la plie pyrda da ka Dr. Eureka F.P Lyngdoh kaba dei ka Principal jong ka Sankardev College ha ka jingdon ryngkat i Dr. Sukjai Swer Convener jong ka Sports Committee, ki dkhot jong ka Sports Committee bad kiwei kiwei. Ha katei ka rynsan la ïashim bynta da 9 tylli ki College kiba don ha Nongbah Shillong.
Nalor ka Sankardev College kiwei pat kiba la ïashim bynta ha katei ka rynsan ïakhun kti ki kynthup ïa ka Seng Khasi College, Shillong College, St Anthony’s College, St Mary’s College, Synod College, Shillong Commerce College, St Edmund’s College bad ka Lady Keane College.
Ha ka liang ki kynthei kiwei pat kiba la jop ha ki kyrdan bapher bapher ki kynthup ïa ka samla Medariphylla L.Nongbri (55kg) jong ka St. Edmund’s College, Bandarika Kharkongor (60kg) jong ka St. Edmund’s College, ka salam Zarienia Rapsang (65kg) jong ka Synod College, Ladapbiang Malieh (75kg) jong ka Seng Khasi College bad ka Hathoithiem Gangte (80kg) jong ka St. Edmunds College.
Katba ha ka liang ki shynrang ki kynthup ïa u Bankerlang Nongkhlaw (55kg0 jong ka St. Anthony’s College, Enistone R. Marak (65kg) jong ka Shillong Commerce College, u Marthaniel Tariang (70kg) ka St. Edmunds College, Nangapjingbha Nongrum (80kg) ka Shillong Commerce College bad u Vishal Dey (85kg) jong ka St. Edmund’s College.