Da ka khusnam ‘1st Prof. Barrister Pakem Academic Excellence Award’ pynkup burom ka JSU ïa ki samla pule
Jowai, Jylliew 14: Ka Jaiñtia Students’ Union (JSU) Central Body lyngba ka Education Cell hynnin ka sngi saitjaiñ 13 tarik u Jylliew kala pynkup burom ïa ki samla pule da ka khusnam ‘1st Prof. Barrister Pakem Academic Excellence Award’ haka jingïalang bala pynlong ha District Library Auditorium, Jowai.
Ha kane ka sngi ka seng kala ïoh ban pynkup burom palat 80 ngut ki samla pule kiba la wan shakhmat ha ki eksam kynthup ïaka SSLC, HSSLC, ki Gold Medalist bad ki Ph.D. researcher halor ka phang kaba ong “Empowering Minds, Shaping Futures, Celebrating Excellence”.
Na ka liang u myntri ka tnad pule puthi jong ka sorkar jylla u ma Lahkmen Rymbui ula long kum u kongsan, uba la pynpaw ka jingsngewkmen haba ïohi ïa ki samla pule kiba la poi shakhmat ha ki eksam bapher bapher, haka juh ka por ula pynkynmaw ïa ka burom kaba khraw jong u Prof. Barrister Pakem haka pule la puthi bad ha ka imlang ka sahlang hi baroh kawei.
Kiwei de ki riew rangbah ka thaiñ kiba la wan ban don lang ha kane ka sngi ki kynthup ïa ka Dr. Didakamiwan Khonglah (khun u Prof. Pakem), U Prof. Henry Lamin (Ex-Pro VC NEHU), ki MDC, ki ophisar sorkar bad ki nongïalam seiñbhalang. La pynshongshit shuh shuh ïa kane ka sngi da ki jingrwai ba sngewtynnad da ka kynhun Elev8 Choir, nalor ki khun samla bad ki kynhun sengbhalang.
Ïa ka jingïalang la pynïaid da u samla T. Suchen, ex-General Secretary JSU, da kaba pynsngew ba ka prokram kala long kaba jop lyngba ka jingïalam u Education Secretary samla Bocheru Mi Pohsnem nalor ka jingkyrshan u President ka seng Jersom Shylla bad baroh ki dkhot ka JSU.
U Secretary B. Pohsnem ula ong ka jingthmu ban pynlong ïa kane ka prokram pynkup burom ka long shi bynta kum ka dak ban ai mynsiem ïa ka jingtrei shitom jong ki samla pule ka thaiñ bad kum ka jingkynmaw burom ïa u (L) Prof. Barrister Pakem uba la saiñdur ïa ka lawei ban don ka jingkitkhlieh ban pynkiew ïa ka pule puthi haka imlang sahlang.
Ka JSU kala pyntip ïa kane ka jingpynkup burom yn pynlong manla u snem shi bynta ban ai mynsiem ïa ki samla pule ka thiañ ban kin bteng ïa ki jingpule kiba kham shalor.