Hapoh 4 sngi ai ka por ka HYDC ïa u DMHO ban jubab halor ka jingphah ïa u Doktor Mrad ban eksamin briew

Shillong, Jylliew 13: Ka Hynniewtrep Youth Development Council (HYDC) East Jaintia Hills District kala ai por 4 sngi ïa ka ophis u District Medical & Health Officer (DMHO) East Jaintia Hills District Khliehriat, Meghalaya ban pynshai halor ka jingkynnoh ba la phah ïa u Veterinary Doctor ban peit bad eksamin ïa u nongïalam tih dewiong u ba shong shah thngan.
Ka Hynniewtrep Youth Development Council (HYDC) East Jaintia Hills District ka dawa ïa ka ophis ka jong u DHMO ban pynshai paidbah halor ka jingmih khubor ba ka ophis, ka jong u ka la phah ban examine ïa u nong shah thngan da u Veterinary Doctor ban peit bad eksamin ïa ka jingkoit jingkhiah jong u tei u nongïalam.
Mihsalan Thoo uba dei u President ka Hynniewtrep Youth Development Council (HYDC) East Jaintia Hills District u la ong, Ka HYDC ka dawa ba phin phah ïa ka jubab ha, lane shwa ka 17 tarik u Jylliew 2026, kaba dei ka sngi Balang halor katei ka jingshah kynnoh.
Na ka Liang ka HYDC ka dawa ba phin pynshai halor kine ki mat harum: Hato ka long shisha ba la phah ïa u Veterinary Doctor ban peit bad eksamin ïa u nong shah thngan?.
Lada ka long shisha, mano ba la ai hukum bad ha ka bor jongno la leh ïa kane?
Kaei ka aiñ lane ka rukom treikam paidbah kaba shah ïa u Veterinary Doctor ban eksamin ne khmih ïa ka jingkoit jingkhiah jong u briew ha kum kane ka jingïakhih paidbah?.
Hato ym shym la don satia u Medical Officer (MBBS) uba bit ban pyndep ïa kane ka kam?.
Hato kane ka jingleh ka ïahap bad ki kyndon bad ki protocol ba la buh da ka Health & Family Welfare Department?.
Na ka Liang ka HYDC ngi sngew diaw, haduh katta katta ïa kane ka jingjia ka ba ym pat ju jia ha ka history jong ka jylla ka jong ngi. Lada ka seng ka shem ba ka don ka jingleh thurmur na ka Liang ka ophis ka jong ka seng kan iakhih pyrshah bad kan dawa ruh ban sospon bad wengkam noh ia baroh kiba donkti ha kane ka jingleh torti bad jingleh bym suidniew ia ka mynsiem briew.