Rakhe ka MTSA ïa ka jingdap 50 snem ka jingshakri u Master U.N. Shukla

SHILLONG, Jylliew 10: Ka Meghalaya Taekwondo Sport Association (MTSA), ha ka jingïatreilang bad ka Taekwondo Institute of Meghalaya (TIM), ka la lah ban pynlong ïa ka jingïalang kaba kyrpang ha ka 07 tarik u Jylliew, 2026, kum shi bynta ban rakhe ïa ka jingdap 50 snem jong ka jingshakri u Master U.N. Shukla ha ka jingïalehkai Taekwondo.
ïa kane ka prokram la pynlong ha Babu Mani Singh Gurung Auditorium, Gorkha Patshala Higher Secondary, Shillong.
U U.N. Shukla, udei u wei na ki nongsdang ïa ka jingïalehkai Martial Arts ha India bad udei u nongjop takma ba nyngkong eh jong ka jylla (1982), International Medallist (1983/84), u International Referee, International Master, bad uba la ïoh ïa ka kyrdan 5th Dan Black Belt na ka Kukkiwon, South Korea.
Kane ka jingïalang ka pynkup burom ïa ki jingnoh synñiang kiba khraw jong u sha ka jingpynroi bad jingkiew jong ka Taekwondo ha ka thaiñ naduh u snem 1976. Ka jingrakhe ka la kut da ka jingïalang sam khusnam ïa ki nongïalehkai kiba la ïoh ïa ka kyrdan ‘Kukkiwon Black Belt’, ha kaba 17 ngut ki samla na Meghalaya kila shah pynkup burom.
Ki nongïalehkai kiba la ïohpdiang ïa ka 1st Dan Award ki long u Kiran Shekhawat, Retika Paul, Soumyajeet Paul, Ranchita Paul, Neha Shukla, Anant Narayan Shukla, Herwood Thabah, Vastab Sarkar, Akansh Barua, bad u Manvik Agarwal.
Kiba ïohpdiang ïa ka 2nd Dan Award ki long; P.G. Jyrwa, Ravi Thabah, Shahjahan Hussain, Aman Shukla, bad Subir Paul. Nangta ar ngut ki la ïohpdiang ïa ka 3rd Dan Award, Amal Chakravorty bad Prem Narayan Shukla.
Na ka liang jong ka Association ka la ai khublei kyrpang ïa baroh ki nongïalehkai kiba la jop bad pynpaw ka jingsngewnguh kaba khraw ïa kiba ha ïing ha sem bad ki nongkyrshan, na ka bynta ka jingkyrshan bad jingshaniah ba khlem sangeh jong ki ha kine ki snem.