Shillong, Naitung 19 : U Myntri ka tnad Transport u ma Dasakhiat Lamare u la ong ba ka tnad ka dang pynbit pynbiang ïa ki kyndon bad jingkdew lynti ïa kito ki samla kiba pynïaid bad kamai ïa ki thuk thuk bad scooty lyngba ka Rapido.
“ Ngi dang pynkhreh ïa ki kyndon khnang ba kan ym ktah ïano ïano ruh” ong u ma Dasakhiat.
U la ong shuh shuh ba kane ka jingkhang kamai ïaki thuk thuk bad scooty ka la ktah jur ïa ki samla hynrei kane kala jia hadien ba la ïoh ka jingujor na ki nongñiah taxi ba kine kiba kamai da ki thuk thuk bad scooty ki la knieh palat ïa ki passenger namar ki la sdang sa ka ïeng laiñ ruh. Katba ki paidbah pat ki pynpaw ka jingkmen na ka jingdon kine ki thuk thuk bad scooty ba kamai namar ki lah ban poi kloi sha ki kam ki jam ne sha kino kino ki jaka ba ki kwah ban leit donkam namar kham duna ka jingsahkut ha ka dheng kali.
