Shillong, Naitung 19 : Hadien khyndai sngi ka jingleit wad ïa ki nongïalehkai ba tbit ha ki san tylli ki distrik jong ka rilum Garo, ka State Talent Identification Testing program kaba la sdang da ka Meghalaya State Olympic Assocïation (MSOA) ryngkat ka jingkyrshan jong ka Department of Sports and Youth Affairs, bad pyntyllun ïa ka kam pat da ka Edge10 Group hapoh ka jingïalam jong u Ïan Campbell, Olympïan(Triple Jumper -Australïa 1980 Moscow Olympics), ka kynhun ka la lah ban sei pyrthei ïa ka jingtbit bad ka jinglah ba kyrpang jong ki katto katne ki nongïalehkai kiba kynsai jong ka jylla.
Haba kheiñ kyllum lang ki don baroh 10 ngut ki khynnah shynrang bad 6 ngut ki khynnah kynthei naduh ka rta ba 13 haduh 17 snem ka rta kiba ka jingstet bad ka jinglah jongki ka long kaba palat ha ki saw tylli ki jingïalehkai la ka long ha ka 20M sprint, 10m sprint, 10m ladder run, compass drill (agility) bad ruh ha ka vertical jump, kata ruh tang ha ki san tylli ki distrik jong ka rilum Garo.
Ka kyrwoh na ka MSOA ka ong ruh ba ki don ki khynnah kiba pyni ïa ka jinglah jong ki, kiba u Ïan Campbell u la ai jingmut ba lada ki biang ka jingkilan met bad ka jinghikai kaba ym duna ïa ka saw taïew kin lah ban tbit shuh shuh.
Shwa kane, ka MSOA, ka Edge 10 bad ruh ka kynhun na ka DSYA ha ka 09tarik u Naitung ki la pynlong ïa kum katei ka juh ka prokram ha Mawkyrwat, South West Khasi Hills. Ha kane ka jingleit, ka kynhun ka lap ruh ba katto katne ki nongïalehkai ba kynthup ïa u Lamboklang Tongwah, Jeyson Dkhar bad ka Fairly Syiemlieh ki la pyni ïa ka jingtbit bad pynhun ruh ïa ka kynhun halor ka jinglah jong ki.
Mynta ka kynhun kan leit ruh ha kiwei ki distrik kynthup ha ka 20tarik ha Mairang, 21tarik ha Nongstoiñ, 22 ha Nongpoh, 23tarik ha Jowai, 25tarik ha Khliehrïat bad 26, 27, 28 bad 29 ha Indoor Basketball Stadium, St Anthony’s HSS, Laitumkhrah, Shillong).
Hadien ba la pyndep ïa ka jingwad sap, ka kynhun kan sa phah pat ïa ka kaiphod ryngkat ka jingai jingmut haba ïadei bad kitei ki nongïalehkai kiba kynsai ba ki lap. Kane ka long katkum ka kyrwoh ba la phah da u Working President ka MSOA, Bah John F Kharshiing.
