Kular u MLA ban sei da ki Doktor wanrah pynban da ki Kharmetor

Shillong, Naitung 18 : Sngang da u ‘nembah khyrwit u bah Paul Lyngdoh, MDC ka Jaiaw Constituency bad MLA ba rim ka Shillong West Constituency ïa u MLA ba mynta u bah Mohendro Rapsang namar u la dep kular ïa ki paidbah ban wanrah ïa ka Medical College ka ban sei ïa ki doktor ha ka jylla hynrei ha katei kajuh ka jaka ba 3 acre ula wanrah pynban mynta da ki Kharmetor.
“ Kumno un pyrshah ïa ka rai ka sorkar haba ma u ruh u ïatrei lang bad kane ka sorkar MDA hadien ba la phet na ka Congress bad bat ruh ïa ka kam Co Chairman ka Meghalaya New Renewable Energy Development Agency (MNREDA) ha ka kyrdan Grade A kaba mut ha ka kyrdan Myntri sorkar hi. Kane ka dei tang ka buit sianti ban da rapjot ne tep eitmiaw hakhmat ki paidbah ïa kaei kaba u la leh na lyndet bad ïa sngewthuh jingmut lang bad ka sorkar kaba u ïadon lang. Namar lada ym dei ba u ïa tip lang ka sorkar kam lah ban shim rai namar ka hap beit ban twad jingmut bad ïoh ka jingmynjur na u MLA jong ka Constituency namar ka ju long ka rukom ba ka sorkar kan hap ban ïamir jingmut beit bad ki MLA shwa ba kan leh ne shim kano kano ka rai kaba hap ha kano kano ka constituency khamtam ki projek ne skhim ba heh ne kiba lah ban ktah ïa ka imlang ka sahlang” ong u bah Paul Lyngdoh.
Nalor kane u bah Paul ula ong, u bah Rapsang u la kular ha ka por shwa ba un mih madan kum u kyrtong jongka seng Congress ha u 2017 ban wanrah ïa ka Medical College ha kaba la ïadon lang u Dr Mukul Sangma kum u Myntri Rangbah ka jylla bad bah A.L Hek kumu Myntri ka tnad ka koit ka khiah ha ka sngi ba plie ïa u maw nongrim ban tei ïa ka Medical College ha phyllaw ka TB Hospital bad ban pynkynriah noh iaka TB Hospital sha Umsawli hynrei ka long thik kum uto u lum uba la suh khun la arsien bad kha pat da u dkhan. Kaei kaba u bah Paul u mut ban ong ka long ba arsien la dep plie maw nongrim ban wanrah ïa ka Medical College ha katei ka jaka ba 3 acre hynrei mynta wanrah pynban da ki Harijan.
Shuh shuh u bah Paul u la ong une ujuh u MLA uba la pyrta shla bad kular ban pynlong ïa ka West Shillong Constituency kum ka Smart Constituency hynrei u pynlong pynban ïa ka da ka Sma Constituency namar ba u la wanrah da kitei ki kharmetor na Them ïew Mawlong ïa kaba ym donkam ban batai, ki paidbah kiba ïaid ba ïeng ki ïohi hi da la ki jong ki khmat kumno ka Them ïew Mawlong ka long kaba dap tang ka jingsma iwtung suda bad ka bym bit bym biang ban sah ki briew khamtam ki khyllung khynnah namar ka dap da ki jaboh bad kaba ktah ïa ka jingkoit jingkhiah jong ki briew naduh ki khynnah haduh ki rangbah.
Kumta u bah Paul u la ong ba “Ki paidbah ka Constituency ki dei ban peitmat bad kyndit bynriew noh namar ki la ïohi ki ïoh uba kum uno u nongmihkhmat ne u MLA uba ïadon lang hapoh ka sorkar MDA bad pyrshang pat ban pyrshah ïa ka rai hi jong ka sorkar kaba u ïoh ban shong shuki Co Chairman”.