Shillong Jymmang 30: U Symbud Myntri Rangbah ka jylla uba peit ïa ka PWD Roads & Buildings u Bah Prestone Tynsong ula plie paidbah ïa ka surok ba ka sorkar ka la jer kyrteng ban pynsahkynmaw ïa u Dr Friday Lyngdoh (Bam kwai ha dwar U Blei) kaba sdang na Mission Compund, Wahthapbru shaduh Jaiaw Pdeng.
Shwa ban plie ïa u maw ba la thoh kyrteng ha kynroh la ïoh shwa ka jingduwai na u Rev J.F Jyrwa. Hadien kane u Bah Prestone ula plie ïa ka jingthoh ba la wah ha kynroh kaba la thoh Dr Friday Lyngdoh Road ha ka jingdon ryngkat ki khun, ki ksiew, ki pyrsa, pyrsa kurim bad ki bahaïing bahasem u Dr Friday. La ïadon lang ruh u MLA ka North Shillong Bah Adelberth Nongrum, MDC bad Chairman ka KHADC Bah Strong Pillar Kharjana, ki nongïalam shnong ka Mission Compund, Wahthapbru, Jaiaw Pdeng, Mawkhar, Umsohshun, Wahingdoh, Riatsamthiah, ki Tymmen Basan, ki Seng Longkmie ba la shah khot sngewbha na ki Dong ne Shnong bapher bapher kumjuh ruh ki khun samla bad kiwei kiwei.
Ka jingjer kyrteng ïa kane ka surok ka long kum ka dak ban pynsahnam kynmaw burom ïa u MLA barim ka Mawkhar Constituency u Dr Friday Lyngdoh uba long ruh u Tymmen Basan ka Balang Presbyterian Mawkhar, uba la noh synniang bha sha ka imlang sahlang bad ïa ka jylla baroh kawei.
Haba kren ha ka jingïalang kaba la long ha ka Dorbar Hall jong ka Mission Compound u Bah Prestone ula ong, ba ula ïatrei lang bad u (L) Dr Friday Lyngdoh hapoh ka seng Congress naduh u snem 2003 haduh 2013 bad u Dr Friday ula long kum u nonghikai bad u nongïalam lynti bad u dei ruh u nongïalam uba trei na ka bynta ki paidbah bad noh synñiang bun bha ïa ka jylla. U la ong ruh “ Nga long kumne kumba nga long ha ka saiñ pyrthei dei namar nga la ïoh ka jinghikai kaba paka na u (L) Dr Friday Lyngdoh.
U Bah Prestone ula pynkynmaw ruh ba ha ka por ba ula leit sha Delhi ryngkat bad u Dr Friday ban ïakynduh ïa ka Sonia Gandhi bad kaba phylla ka long ba ym ju donkam ban bud ryntih ïa ki kyndon hynrei ka Sonia kala wan hi dalade ban wan shaw ïa u Dr Friday Lyngdoh naduh naduh phyllaw. Nalor kata man ba leit sha Delhi um ju klet ban rah sohtrun ïa ka Sonia Gandhi.
Ula ong ruh, ba u Dr Friday u dei u rangbah uba shakri ïa ka bha ka miat ki paidbah bad uba ïeng skhem ha ka nongrim bad ym ju don ruh ïa kino kino ki nongshun bad ula kyntu ïa ki khun bad ïa ki bahaïing bahasem bad ki dei ban bud ïa ki nuksa ba bha jong une u radbah.
Kumjuh ruh la ïoh ka jingkren na u MLA bad MDC ruh kiba la ai ka jingïaroh ïa ka jingshakri jong u Dr Friday Lyngdoh ym tang ïa ka Constituency hynrei ïa ka jylla hi baroh kawei. Ki la pynpaw ba u long u briew uba sngewrit,. uba kloi ban ïarap bad uba skhem bha ka nongrim.
La ïoh ruh ka jingkren pdiang na u Rangbah Shnong bah T.Rumnong, ai jingkren na u Asst. Rangbah Shnong bah T.War, bad kren ai khublei da u Secretary Shnong Prof. D War.
