Rai ka UDP ban kiar katba lah na ka jingkynthoh bad kren beiñ briew ha rynsan elekshon

Shillong, Jymmang 31 : Ka UDP ka la pynkhreh lypa ba ka rynsan ïalap elekshon jong ki kan pher na kiwei pat ki party da kaba sdang naduh kane ka elekshon MP shiteng samoi kaba lah ban sa long shen ha kine ki khyndiat bnai ban wan.
Katkum ka jingong jong u General Secretary ka Party Bah Titos W Chyne ba dei ruh u Nongïalam ka Liang Pyrshah ha KHADC ka party ka la rai ba kan kiar katba lah na ka jingïakynthoh, ïa beiñ bad kren beiñ briew ha ki rynsan ïalap elekshon.
“Ngi la dep kren ha ka jingïalang ba ha ki rynsan ïalap elekshon ngin kham kiar ban ïa kynthoh briew, ban ïa kdew kti ban ïa beiñ, kum kine ki dei ki bym itynnad. Bad ha ka jingsngew jongngi kum ka UDP ngi dei ban pyni ba kum ki nongïalam ngi don ïa ka mynsiem nongïalam ba kaba sngewrit bad ym dei ban sngew hangamei bad ban ym kob ne sngew sarong,” ong u Bah Titos haba kren bad ki lad pathai khubor.
Katkum ka jingong jong u, ka jingthmu jong ka party ka long ban kren beit ïa ka nongrim kaba ka party ka don bad ka kwah ban pynshai sha ki paidbah.
Shuh shuh u ong ba la ju ong ba ka dei ka Jaidbynriew tip briew tip blei kumta ym dei ban ïa kynthoh, ban ïa kren kai ban ïa kren biria ha ki rynsan ïalap elekshon. Kumta u ong ba dei halor kine ki nongrim ba ka party ka la shim ïa ka rai ba kin ïaid beit la ka jongka nongrim bad ban kiar lut na kum kitei ki rynsan ïalap elekshon kynthoh bad kren beiñ briew.
Haba ïadei pat bad ka elekshon u la ong ba la kumno kumno ki khmih lynti ba naduh kane ka taiew kin sdang noh bad ïa ka jingïalang kaba nyngkong kin pynlong ha Sohra.