Shillong, Naitung 18 : Da ki spah ngut ki nonghikai SSA hapoh ka lama jong ka Meghalaya Sarva Shiksha Abhiyan Schools Association ki la rai ban sahmiet ha parking lot jong ka Additional Secretariat hadien ba ka jingïakren bad u Additional Chief Secretary ka jylla na ka bynta ban pyllait noh ïa ka tulop ba sahkut la 5 bnai kam shym la seisoh.
“Kam myntoi ba ngin leit phai sha iing ruh namar ym don ei ei shuh ban bam, kumta ngin shong beit hangne,” ong u President jong ka Meghalaya Sarva Shiksha Abhiyan Schools Association, Babu Aristotle Rymbai haba kren hadien ka jingwan kynduh ïa u Additional CS, Bah DP Wahlang hynne ka sngi.
U la ong ruh ba katei ka rai ba ki shim ban shong kyllaiñ myngor beit hangtei ka long ban ap beit haduh ban da wanphai u Commissioner Secretary ka tnad Pla Tyngka ka jylla khnang ban ïoh kynduh biang bad u bad ban sngewthuh ïa ka daw kaba ki bat sah ïa ka 44 klur tyngka.
Katei ka rai ba ki nonghikai SSA kiba la don baroh haduh kumba 12,400 tam kadei namar naduh u Rymphang haduh mynta kim pat ïoh satia ïa ka tulop, kaba ki ap khmih lynti ban ïoh pyndap pynbiang ïa ki jingdonkam baroh ha iing.
Tad haduh ka por 8:00 baje janmiet, u President u la ïathuh ruh ba na ka liang ka sorkar kam pat ai jubab ei ei halor katei ka jingdawa kaba kum ki nonghikai ki pynsngew.
Lah ban kdew hangne, ki nonghikai Adhoc jong ka jylla ki la sahmiet haduh shi taiew pura ha katei kajuh ka jaka ban dawa kyntiew noh ïa ka tulop kaba na ka liang ka sorkar mardor ka la pyntreikam.
