Shano yn pynïasoh u Bah Adelbert sha ka Cong, HSPDP ne VPP ?

Shillong, Naitung 18 : Hadien ba u MLA ka North Shillong Constituency u bah Adelbert Nongrum u la rai ban ym ïaleh shuh ïa ka election MLA 2023 na ka KHNAM hynrei un ïaleh noh na kiwei pat ki party, ka jingkylli kaba mih na kiba bun ba lang ka long sha kano ka party un pynïasoh, hato un pynïasoh sha ka Congress, HSPDP ne VPP namar kiwei kiwei ki party kum ka UDP, NPP, TMC, BJP ki la don lypa ki kyrtong jongki.
La ïoh jingtip ba u bah Adelbert u dang pyrshang ban twad jingmut na ki nongïalam ka HSPDP, VPP bad wat bad ka Congress ruh ha kine ki khyndiat por ba la dep shwa ba un shim ïa ka rai hynrei shano un pynïasoh ym pat don ba tip.
Haba ïakren bad ki nongthoh khubor mynta ka sngi ula ong “ Nga kloi ban pynïasoh sha ka BJP lada ka sorkar pdeng ka pyntreikam ïa ka Inner Line Permit (ILP) bad weng syndon pura ïa ka Citizenship Amendment Act (CAA) na kane ka jylla Meghalaya”.
“ Lada ka BJP ka kular ban pyntreikam ïa kine ar ki mat kiba kongsan ha ka jylla nga kloi ban leit pynïasoh sha ka BJP” ong u bah Adelbert.
U la ong kawei na ki mat ba kongsan tam ba ki paidbah ki ap khmih lynti naka sorkar pdeng ka dei ka ILP. “ Ka BJP ka dei ban leh kumjuh ïa ka Meghalaya kumba ka la leh ïa ka Manipur ban ai ïa ka ILP. Kaba ar ka long ba ka BJP ka dei ban pynbeit mardor ïa u pud u sam ka Meghalaya bad Assam namar ka Assam ha ka kyrteng jong ki kam pynroi pynpar ka la nang kyntur bad knieh ïaki jaka puta na ki trai shnong ka Meghalaya ha khappud. Nga kyntu ruh ïa kito ki MLA kiba don ha ki bynta khappud ba kin theh ki kam pynroi sha ki shnong ha khappud” ong u bah Adelbert.
“Lada ka BJP ka kwah ban khot ïa nga ka dei ban pyntreikam shwa ïa kine ki mat kiba nga la kdew “
Haba la kylli kaei ka daw ba u la rai ban mih noh na ka KHNAM u la ong “ Ka jingïakynad bad jingbym ïasngewthuh jingmut hapoh ka KHNAM kala pynlong ïa nga ban ym banse shuh ban shim noh da kane ka rai ban mih noh na ka party khnang ba kito kiba thrang ban ïalam ïaka party kin ïoh ban leh katba ki mon. Nga la ïai shah baroh shikatta, nalor ba nga long MLA tang marwei, ki la dei ban burom lem ïa nga. Ngam ju ïaid pyrshah ïa ki nongrim treikam jongka Party ban ïakhun ha ki nongrim na ka bynta ki paid nongshong shnong ka jylla. Kumta haba ngam i don jingmyntoi shuh ban ïadon ha kaba kum kata ka party nga la rai ban mih noh khnang ba kiwei kin ïoh ïa lam ïa ka KHNAM katba ki kwah”.
“ Kumjuh ruh nga la tyrwa ïa lade sha kino kino ki party kiba kwah ban khot ia nga namar lada ki pdiang ïa nga kin hap ban pdiang ïa ki nongrim treikam kiba nga ïeng na ka bynta ki paidbah. Nga sngew ka la dei ruh ka por ban bishar bniah biang ïa ka Reservation Policy jongka jylla namar ka la rim palat. Kane ka Reservation Policy ka la rim palat bad donkam ban pynthymmai noh ïa ka” ong u bah Adelbert.
“ Ngi donkam ban weng, ban pynthymmai, ban pyndam ïa ki kyndon kiba ktah tang ïa kawei ka jaidbynriew bad kawei pat ym dei ban pyntreikam da kane ka policy ha ka bhah pule puthi namar kane ka dei ka policy thung kam jongka sorkar” pynkut u bah Adelbert.