Mih ki Seng ha Garo ban pyrshah MeECL

Shillong, Naitung 18 : Ka kynhun ki sengbhalang na rilum Garo ba kynthup naduh ka GSU, FAF, FKJGP bad AIGU, ki la pynlong da ka jingpyrshah ïa ka tnad MeECL ha East Garo Hills hadien ba katei ka tnad kam shym la lah ban jubab ha ki 15 sngi ba ki seng ki ai por haba ïadei bad ka jinglip bording khah khah ha katei ka thaiñ.
Ki jingdawa ba kitei ki seng ki pynkynmaw biang ka long ba ki kwah ïa ka bording kaba ym don jingthut ha rilum Garo, nangta ba kan ym don shuh ka jingthungkam da kaba shah liang ha ka tnad, ban pynbiang ïa ka jingdon ki nongtrei bad ruh pynsangeh ïa ki nongtrei na rilum Garo sha rilum Khasi khlem da thung bujli da kiwei.
Shuh shuh la kdew ruh ba ym don uwei ruh u nongtrei Garo ba shah thung ha Head Office Shillong ha katei ka tnad. La kdew ruh ba ha u 2020 2021 wat la ki don bun ki jingthung kam ha rilum khasi hynrei kam shym la don pat ka jingthungkam iwei ruh ha rilum Garo.
La ai por ruh ba lada kam don kano kano ka jingjubab na ka tnad, kitei ki seng ki la byrngem ruh ban shim da kiwei pat ki sienjam kiba kham tyngeh.
Kane ka long katkum ka kyrwoh ba la phah da u Saljrang Tenggrik R Marak, President ka Garo Students’ Union, Eastern Zone, Williamnagar.