Balei khlem pat ïoh jingbit ban kamai ki shah ïa ki kompeni ban treikam ha ka Jylla buh jingkylli ka Kong Angela

Shilong, Naitung 18: Ka nongailam ka Thma U Rangli Juki ka Kong Angela Rangad ha ryngkat ki nongkamai leit on bad leit shaw briew da ki ar shaka ha ka sngi Nyngkong jong ka 18 tarik ki la leit ban ait ia ka dorkhas sha u Commissioner& Secretary jong ka tnad ka leit ka wan ka sorkar jylla ban dawa na u ba ka sorkar ka dei ban ban ai jingbit ïa ki ar shaka ba kin kamai biang ha Shillong bad ba ka sorkar ka dei ruh ban ai Permit kamai ïa ki bad ba ka sorkar ka dei ban pynshna ïa ki aiñ bad ki hukum ban treikam shipor(interim order) tad haduh ba ka sorkar kan lah ban wanrah da ki aiñ kiba paka
Haba kren sha ki lad pathai khuor ka Kong Angela ka la pynpaw ïa ka jingpyrshah kaba jur ïa ka jingkhang syndet ka sorkar ïa ki ar shaka ban kamai ha ka jylla bad ka la ong kane ka jingleh ka sorkar kan pynïap thngan ïa kiba bun ki khun samla kiba im ja na kane ka kam. Ka Kong Angela ka ong ruh ba ka sorkar ka dei ban wanrah da ki lad ki lynti ban ai lad biang ba kin kamai da kaba kan ai permit bad wanrah ïa ki kyndon ban pynbeit pynryntih ïa ki ar shaka kiba kamai.
Ka kong Angela ka la ïathuh ba ka la leit ryngkat ki samla kiba kamai thuk thuk ban pan jingshai ruh na une u sahep sorkar halor ki aiñ ki rul kiba ka sorkar ka la shna ha kaba ïadei bad ki thuk thuk kamai.
“Ka sorkar ka kam man ka por ka kam ba ka kyrshan bad pynshlur ïa ki samla kiba ieng ha a ki kjat lajong bad ynda ki la ïeng balei pat ki khang pynban” buh jingkylli ka kong Angela.
Shuh ka kyntu ruh ïa ka sorkar ba ka dei ban peit ïa ki kompeni kiba wan na shabar namar ka jingkamai be-aiñ jong ki khlem pat ioh jingbit satia ban treikam ha Shillong. Ka kong Angea ka la buh jingkylli ruh ïa ka sorkar namar ka jingailad ïa ki kompeni kiba na bar kum ka Rapido ba kin kamai khlem pat ioh jingbit bad khlem da siew kano kano ka khajna sha ka sorkar.
“Ka sorkar ka dei ban pyrkhat ïa kine ki samla namar kane ka jingkhang kamai ka sorkar kan pynïapthngan ïa ka iing ka sem jong ki” ong shuh shuh ka kong Angela.