Mawkyrwat, ‘Naitung 18: Ka National People’ Party Youth Front (NPPYF) jong ka Langrin Warsynlyngdoh Area ka la ïoh ïa ki nongkitkam ba thymmai ha kaba u bah Kitborlang Nongrem, Youth President jong ka National People’ Party Youth Front (NPPYF) u la ïoh ban pynskhem ïa ki.
U bah Kitborlang Nongrem, Youth President jong ka National People’ Party Youth Front (NPPYF) haba kren ha ka jingïalang u la ai mynsiem na ka bynta ki nongkitkam kiba la shah jied thymmai ba haba ki trei ïa ka kam ban pyntyllun ïa ka saiñ hima sima khamtam eh ban pynkhlaiñ ïa ka prty lyngba ki samla kaba ïa dei bad ka kam ban jied ïa u nongmihkhmat na ka bynta u snem 2023 ki dei ban trei da ka jingstad bad jingshemphang ha ki bynta baroh khnang ba kan nym don kano kano ka jingshah peit khmat ne shah kynthoh.
“Ha ka kam saiñ hima sima ha ki jingtreikam bunsien kin sa shah kynthoh bad shah kren beiñ, wat sngap ïa kita ki ktien hynrei dei ban trei bad pyntyllun ïa ki kam shakhmat”, ong u bah Kit.
Ki nongkitkam jong ka National People’ Party Youth Front (NPPYF) jong ka Langrin Warsynlyngdoh Area kiba la shah pynskhem ki long u Thrangbor Wanniang kum u President, u Seibor Thongni kum u General Secretary, u Bestarlin Lyngdoh kum u Working President, u Peter Wanniang kum u Vice President, u Ones Marshra kum u Assistant Secretary, Treasurer i kong Nisbabell Marthong, Advisers u bah B.N. Lyngkor bad u Ready Marthong bad ha ryngkat ki 5 ngut ki dkhot.
Ha kane ka sngi la ïadonlang ruh u bah Bajop Pyngrope, Spokesperson jong ka National People’ Party Youth Front (NPPYF) ha ryngkat ki ‘riew rangbah jong ka dong ka thaiñ.