Shillong, Naitung 18 : U MLA ka Mawlai konstitwensi u bah Process T Sawkmie u la sam kumba 10 song ki jersey na ka bynta ki klob ha Mawlai kiban leit shim bynta ha ka phutbol jong ka KSU Mawlai Umjaiur Unit kaba la pynïalehkai na ka bynta ban kynmaw burom ïa ka lyngkhuh sngi ïap ba 187 u Tirot Sing Syiem ha madanheh mini stadium, Mawlai Phudmuri.
Hynne ka sngi u MLA u la sam sha ki ar tylli ki klob, kata ka Combine FC bad ka Jadu FC, kiba la ïoh ryngkat bad mar kawei ka bol kaba u la aiti ha ophis treikam jong u ha Mawlai Nongpdeng.
Katkum u Bah PT Sawkmie u la ïathuh ba phra song ki jersey u la sam ha kine ki sngi kiba la leit.
Kumba shu kdew ki don baroh haduh 44 tylli ki kynhun kiba la shim bynta ha katei ka lympung ïakhun ba la pynïaid da ka KSU Umjaiur unit bad ka jingiakhun ka la sdang mynne ka 18 tarik u Naitung, ïa kaba la plie pyrda da u bah Teiborlang Pathaw, MDC Mawlai.
Haba kren shuwa ban aiti ïa ki song jersey u bah PT Sawkmie u la kitbok ïa baroh ki kynhun kiba shim bynta ba kin ïoh khur ïa ka jingjop bad ba kin ïalehkai da ka akor bad da ka burom, khlem da pynmih kino kino ki jingïakulmar.
