Shillong, Jymmang 22: Ha ki artylli ki jingkhynra ba la pynlong ha kine ki sngi bad ha kaba sdang jong ka taïew ha ka thaiñ shatei lammihngi, ka Guwahati Zonal Unit jong ka Directorate of Revenue Intelligence (DRI) ka la ïoh ban kurup ïa ki kwai kiba nabar ri kiba la shalan beaiñ kumba 60,000 kilo eiei.
Halor ka jingïoh jingtip ba kyrpang, ka DRI ka la pynlong ïa ki jingkhynra ha Mizoram bad Assam kaba la ïalam sha kine ki jingïoh kurup. Ha ka jingsdang ïa ki jingtohkit la lap ba ïa ki kwai ba la tyrkhong kiba dei nabar ri la pynpoi tuh sha India na Myanmar lyngba ka thaiñ khappud Myanmar-Mizoram.
Ha kawei na ki jingkhynra la ïarap ïa ka DRI da ki shipai 38Bn jong ka Assam Rifles. Haduh mynta, la kem haduh 5 ngut ha kine ki jingkhynra.
Ka jingwanrah beaiñ ïa ki kwai na ka ri ba marjan ka wanrah ïa ka jingduhnong kaba khraw ha ka ïoh ka kot jong ki nongrep kwai hapoh ka ri bad ka pynthut ïa ka jingshngaiñ ha ka ïoh ka kot ha ki thaiñ khappud.
