Nongstoiñ, Jymmang 21: Ki paidbah ka Mawshynrut baroh kawei ki la dawa na ka sorkar ba ka por ka la dei ban pynbha shuh shuh ïa ka Community Health Centre kaba don ha Mawthengkut, namar watla ka la long ka jingkyrkhu na ka bynta ki paidbah jong kane ka Civil Sub Division. Hynrei, kiba bun ki paidbah khamtam eh kiba pang ba shitom bad donkam jingiarap kyrkieh, ki ïakynduh shibun ki jingeh na ka daw jong ka jingduna ki lad jingsumar ha katei ka jaka sumar.
Haba kren sha ki lad pathai khubor, ki la don katto katne ki nongshong shnong bad riew rangbah, kiba la ong ba haba leit shim dawai na katei ka jaka sumar hap ban ieng laiñ da ki bun kynta.
Kumta haba la leit ban jurip ïa katei ka jaka sumar, la lap ba ki nongwan shim dawai ki duna haduh katta katta bad ki don tang kumba katto katne ngut kiba wan ha katei ka jaka sumar.
Halor ka jingduna Doctor ha katei ka jaka sumar la ïoh ban ïakren bad ki katto katne ki riew rangbah, kiba la pynpaw ba na ka por sha ka por ki sengbhalang kiba treikam hapoh Mawshynrut ki la leit ban ïakynduh ïa ki heh sorkar ban dawa ba kan pynbiang Doctor ha katei ka jaka sumar, hynrei haduh mynta ka sorkar kam shym la sngap satia.
Ki nongshong shnong ha katei ka thaiñ, ki la ong ba lada la sorkar kam pynbiang ïa ki Doctor bad kiwei kiwei ki jingdonkam kum ka jaka sumar paidbah, ka jingduhnong ka long sha ki paidbah nongshong shnong, namar naduh ka rukom check ïa ki nongpang ruh kam biang nalor kata ka rukom ai dawai ruh kam biang.
Lah ban pynkynmaw ba ha ka por ba u bah Sranly Rongrin u dang dei u President ka HYC Mawshynrut Circle, u la kubur ba ka long kaba shisha ba ki don shibun ki jingduna ha katei ka jaka sumar.
U la ong ba ka la donkam ba ka sorkar kan phah Doctor biang sa kumba ar ne lai ngut, namar haba phai sha ka jingdon briew ha katei ka thaiñ ka la palat ïa ka lai phew hajar ngut. Kumta lada ki Doctor ki duna, kan buh ïa kiba pang ba shitom ha ka jingeh kaba khraw.
