Da ka Police Complex kaba paka thmu ka sorkar ban tei ha Rongkhon bad weng jingkhapngiah ka sor Tura

Shillong, Jymmang 21 : U Myntri Rangbah ka Jylla Conrad K Sangma ha ka Sngi Palei u la lum ïa ka jingïalang jong ka Tnad Pulit nangta ka tnad Urban Affairs bad ka Tnad Veterinary ha Tree House, West Garo Hills, Tura, ban pynsdang ïa ka sienjam ban tei ïa ka Police Complex kat kum ka juk mynta ha Rongkhon da ka thong ban pynkylluid ïa ka sor Tura bad khamtam eh ban pynsuk ïa ka jingshakri ïa ki paidbah.
Kane ka project ba la tyrwa la khmih ban long kum ka jingtei ba pura ka ban pynskhem ïa ka jingdon ki jingtei ki Pulit ha Rongkhon ka ban pynlah ruh ïa ka jingpynkynriah noh ïa ka jaka treikam ki Pulit ba don mynta ha Iew Tura.
Kane ka sienjam la khmih lynti ba kan pynduna ïa ka jingkhapngiah ha ka jaka sor bad plie lad ban shna ïa ka jaka pyn pynngad u paidbah bad ban nang pynitynnad shuh shuh ïa ka jingitynnad ka sor ha Tura.
Ha ka jingïalang, u Myntri Rangbah ula ban jur ïa ka jingdonkam jong ka jingplan ïa ka sor kaba ïasoh lang bad ka jingdonkam ban pynmih ïa ki jingtei kiba pynbiang tarajur ïa ka roi ka par bad ka jingneh ka mariang bad ka jingsuk jong ki paidbah. U la kdew ba ka projek ka ïahap bad ka jingïohi jngai jong ka Sorkar ban pynkylla ïa ka Tura sha ka sor kaba khuid, kaba jyrngam, bad kaba la plan bha.
Ka jingtyrwa ban pyntrei kam thymmai ha ka thain Tura Bazaar la khmih lynti ba kan plie ïa ki lad ban pynitynnad, ka jaka ïaid kjat u paidbah, ka jingpynitynnad ïa ka jaka bad ka jingpynmih ïa ki jaka jyrngam na ka bynta ki nongshongshnong bad ki nongwankai ruh kumjuh.
Ki Ophisar na ki tnad bapher bapher ki la ïakren halor ka jingdonkam jaka, ki jingdonkam haba plan, ki lad ki lynti ban ïatreilang bad ka jingpyntreikam ïa ka project da ka bynta bynta ban pynthikna ïa ka jingpyntrei kaba ïaid beit ïaid ryntih.