Wat hapdeng ki jingeh kiba bun : Ngim dei ban sngewthait dei ban trei shitom bad aiti ha ka kam: DM&HO

Mawkyrwat, Jymmang 13: Kum shi bynta ban rakhe ïa ka International Nurses Day, kaba ju long man la ka 12 tarik u Jymmang ha kylleng ka ri bad ka pyrthei baroh kawei, ki nongtrei ka koit ka khiah ne ki nurse jong ka South West Khasi Hills District ki la pynlong ïa ka jingïalang rakhe kaba iphuh-iphieng ha Ranikor Community Health Centre.
Lah ban kdew ba kane ka jingrakhe ïa ka International Nurses Day ka long ka lad ban pynpaw ïa ka jingsngewnguh bad jingïaroh ïa ka jingshakri ba rad-bah jong ki nurse kiba trei miet la bad sngi ban sumar bad jingïada ïa ka jingim jong ki briew.
Ha kane ka sngi kyrpang, u District Medical and Health Officer (DM&HO) jong ka District, u Dr. F.R. Lartang, u la wan ban long kum u kongsan bad ula ai ka jingkren jingïaroh ïa ka jingaiti lut bad ka jingshakri ba minot jong ki nurse bad kiba ju trei shitom ban sumar ïa ka koit ka khiah jong ki paidbah wat hapdeng ki jingeh ba ki ki ïa kynduh.
Ka prokram rakhe ka la long kaba jop da ka jingïashim bynta jong ki nurse ha ki jingrwai, ki jingïalehkai bapher bapher bad kiwei kiwei ki prokram pynbyrngia.
Kum ka dak ka jingai burom ïa ka nonglam lynti jong ka kam nursing, ka Florence Nightingale, la pynlong ruh ïa ka jingthang mombati. Hadien kata, la pynbud da ka jingot cake da ki nurse kum ka dak ka jingkmen bad ka jingïatylli.
La pynïaid ïa ka prokram da ka Kong Wendy bad ka Kong Idanskhem, katba ka Kong S. Marweiñ ka la pule ïa ka Ktien U Blei, ka Kong B. Kharlyngdoh ka la ai ïa ka jingkren pdiang sngewbha, katba ka Kong Shimdorin Syiemlieh ka la kren halor ka phang jong kane ka sngi bad ka bynta kaba kordor jong ki nurse ha ka imlang sahlang.