Shillong, Jymmang 12: Ka sorkar Meghalaya ka la hukum ïa ka jingpynkynriah kam kaba heh hapoh ka tnad kam pohïing, ha kaba la pynkynriah kam ïa 14 ngut ki heh ophisar IPS bad MPS ha kylleng ka jylla ha ka jingpynbna ba la pynmih da u Principal Secretary (Home) u Bah FR Kharkongor ha kane ka sngi Ba-ar.
Kane ka hukum, kaba la pynmih katkum ka jingai jingmut jong ka Civil Services Board bad ka Police Establishment Board, kan trei kam naduh ka sngi ba shimti ia ka kam.
Ha ka kyrdan DIG, u Jerry Fisher K. Marak, IPS u la pynkynriah na Western Range, Tura sha Eastern Range, Shillong, katba u Vivekanand Singh, IPS u la kynriah noh na Eastern Range sha Western Range, Tura da ka jingpynkylla kam (direct swap of posts).
Napdeng ki battalion commandants, u Siddharth Kumar Ambedkar, IPS la pynkynriah na ka 5th MLP Battalion, Samanda ban khlieh ïa ka 6th MLP Battalion, Umran.
U ba don mynshwa ha Umran, u Ashish, IPS, mynta un bat ïa ka kam kum u Superintendent of Police, VIS, Shillong.
U Bah Stephen A. Rynjah, MPS uba dei u SP ka East Garo Hill u la shah thung kum u Commandant, ka 5th MLP Bn, Samanda.
La pyntip ruh ïa ki katto katne ki jingpynkylla ha ka kyrdan jong ka distrik.
U Shailendra Bamaniya, IPS u la kynriah kum u SP ka South Garo Hills, Baghmara sha SP, CID, Shillong, ha kaba u Ringrang T.G Momin, MPS un shimti ïa ka Baghmara na ka CID.
Ïa u Pawar Swapnil Vasantrao, IPS la pynkynriah noh na North Garo Hills sha East Garo Hills kum u SP, katba u Ishan Gupta, IPS un kynriah noh na ka kam CM Security sha North Garo Hills.Mynta u Naman Kumar, IPS un long kum u khlieh duh ïa ka kam CM Security, Shillong.
Ha ka nongbah Shillong la thung ïa u Dangsan Khyriem, MPS kum u SP City, ha ka jaka jong u Dewansh Pandey, IPS, u ban leit shimti ïa ka kam kum u Assistant Inspector General of Police (Law & Order).
U Bah Geffry Waemhok Lyngdoh, MPS u la kynriah na AIG (L&O) ban shimti kum u SP, ka Eastern West Khasi Hills, Mairang.U Hari Prasant M.R, IPS u la shah thung kum u SP (Traffic), East Khasi Hills pyrshah ïa ka kam kaba la thylli kaba la don lypa.
Ka sorkar ka la ong ba baroh ki jingpynkynriah kam la leh na ka bynta ka jingmyntoi jong ka jingshakri paidbah bad kan dang treikam haduh ban da mih da kawei pat ka hukum.
