Shongbishar kam u Myntri Rangbah bad ki Myntri halor ki project ba kot haduh 1331 klur

Shillong, Jymmang 12: Ka jingïalang bishar kam halor ka jingpyntrei ïa ki kam pynroi ba thymmai ha sor Tura la pynlong mynta ka sngi hapoh ka jingpynïaid jong u Myntri Rangbah Conrad K. Sangma, ha ka jingdonlang ki Myntri Sorkar Timothy D. Shira bad Bah Sanbor Shullai.
Ka jingialang kala shong bishar ïa ka jingiaid ki project ba dang don hapdeng ka jingpyntrei bad ïakren ruh ïa ki jingthmu na ka bynta ki kam ban wan, ki ban sa pyntrei ha ki bynta bynta.
Ki project kiba dang ïaid ha ka jingkynshew pisa baroh lang ba kot T.1331 klur ki dei kiba la shong bishar ha kane ka jing ialang.Kine ki kynthup ïa ka Tura Integrated Administrative Complex (T.165 klur), bala khmih lynti ban pyndep da ki bynta bynta kaban sdang naduh u bnai Nailur 2027, ka PA Sangma Sports Complex bad ka West Stand, ka Pa Togan Sangma Track & Field Stadium bad ka Tura Technology Park.
Kiwei pat ki project kiba dang ïaid ki dei ka project ban pynitynnad ïa ka Tura Bazaar, ka jingtei ïa ka Convention Centre, Pelga Tourist Circuit & Hospitality Complex, Working Women’s Hostel, ka jingshna ïa ka Heliport, bad ka Tura Water Supply Scheme.
Ka jingpyntrei thymmai ïa ka Polo Orchid Hotel la khmih lynti ba kan sa sdang noh shen.
Ki project ba shongdor T.242.74 klur kiba la pynkhreh ban khot tender ruh ki dei kiba la iashong bishar ka.Ïa kine yn sa pyntrei da ki bynta bynta bad ki kynthup ïa ka jingpyntrei thymmai ïa ka Najing Bazaar, ka Multi-level Parking bad Cinema Complex ha SMELC, Tura City Park, ka Active Ageing Centre, ka Kid Zone ha Araimile bad ka Tura Promenade.
Kiwei ki project kiba thmu ban pyntrei ki kynthup ïa ka Chief Minister’s Youth Centre, ka jingshna pynbha ïa ka Circuit House, ka Commercial Complex, ka jingpyndait ïa ki street light, ka jingpynroi ïa ki jaka ialehkai ha Kendriya Vidyalaya.
Ki project kiba dang don ha ka jingpyrkhat, kiba la mang T.155 klur, ki kynthup ïa ki ïingsah kiba jem dor, ka archery complex, bad kiwei pat ki jingtei kiba ïadei bad ka kam khaïi pateng.
Ka jingkynshew kyllum kaba thmu na ka bynta ka jingpyntrei thymmai ïa ka Tura ka long kumba T.1928 klur.
U Myntri Rangbah ula ban jur ïa ka jingdonkam ban pyndep hapoh ka por kaba biang ïa ki project bad ka jingiatreilang ba kham bha hapdeng ki Tnad Sorkar.