Jowai, Jymmang 12: Ka Trained Nurse Association of India (TNAI), West Jaiñtia Hills Unit mynta ka sngi 12 tarik u Jymmang kala rakhe ïa ka ‘National Nurse Day’ ha District Library Auditorium, Mynthong, Jowai halor ka phang “Our Nurses, our future: Empowered Nurse Save Lives”.
La rakhe ïa kane ka sngi shi bynta ban kynmaw burom ïa ka Florence Nightingale kawei na ki nongtrei Nurse ba nyngkong eh kaba la noh synñiang haka kam ai jingïarap ha ka liang ka jingsumar ïa kiba mynsaw, ha kaba u myntri ka tnad ka koit ka khiah u ma Wailadmiki Shylla ula long kum u kongsan, katba u Deputy Commissioner u Abhinav Kumar Singh, IAS kum u symbud kongsan.
La sdang ïa ka jingrakhe da kaba pynmeh ïa ka sharak, u ma Wailadmiki Shylla haba ai jingkren ula pynpaw ka jingsngewnguh kaba khraw ïa ki Nurse ka District kiba la aiti met bad mynsiem haka kam shakri ïa ka koit ka khiah ha kylleng ki jaka.
Ula kdew ruh halor ka jingduna palat ki doctor hapoh ka jylla, ha kaba bun ki PHC kiba treikam tang da uwei bad don ruh kiba khlem doctor, Ula kdew halor ki jingeh ha ka rukom pynrung kam ïa ki doctor ha ki thaiñ nongkyndong.
Shuh shuh ula pyntip ba ka sorkar kala thaw ïa ki Medical College kiba thymmai, kynthup ïa ka Shillong Medical College kaba la treikam bad mynta sa ka Tura Medical College bad ka PA Sangma International Medical College hapoh ka USTM ban pynkhlaiñ shuh shuh ïaka koit ka khiah hapoh ka jylla.
‘Wat hapdeng ki jingeh haki jaka sumar hynrei da ka jingdon ki Nurse la lah ban pynïaid shakhmat ïa ki kam ai jingsumar ha kiba bun ki liang’, ha ka juh ka por u ma Wailadmiki ula ai khublei naduh ka District Medical Officer (DMHO), Additional DMHO, ki doktor bad ki nongtrei ka koit ka khiah.
Kiwei de kiba ai jingkren bad ai khublei ïa ki Nurse ka District halor ki kam babha jong ki, ki kynthup ïa u Deputy Commissioner u Abhinav Kumar Singh (IAS), ka DMHO Dr (Mrs). P. Shylla. Katba ka kong Eudora Blah, Vice Principal, ka NEACON, Khliehtyrshi ka la batai halor kane ka phang mynta u snem. Kala pynsngew ruh halor ka jingdonkam ban pynkupbor ïa ki Nurse. La pynphuh pynphieng shuh shuh ïa kane ka sngi da ki jingrwai bad ki jingshad tynrai.
