Ka New Shillong Township Water Supply Scheme ka la ïoh ïa ka mang tyngka kaba 528.44 klur

Shillong, Jymmang 07: Ka sorkar jylla ha ka sngi palei ka la pynshai ïa ka nongrim bad pynpaw ba ka New Shillong Urban Water Scheme (Phase-1) ka la ïoh ïa ka mang tyngka kaba 538.44 klur.
Ka la ong ba la pynwandur ïa ka skim ban pynïoh umdih sha New Shillong Township, ka Mawkhanu Knowledge City bad 32 tylli ki shnong ba marjan.
La pynwandur ban pynbiang 135 LPCD (Liters Per Capita Per Day) kaba lah ban pynbiang umdih ïa ki nongshong shnong haduh u 2057.
Ha kaba ïadei bad ka jingdonkam ban pynthymmai ïa ka dor, ka jingpynkynriah ïa ka Dam: Ka jaka dam um kaba la thmu nyngkong la pynkynriah kham shaneng wah hadien ba la ïoh jingtip ba ka don ka jingpyrkhat ban buh ïa ka jaka bret ñiut ha ki sawdong sawkun jong ka dam kaba la thmu shna thymmai ha shnong Nonghali. Kane ka jingpynkynriah ka la kyntiew ïa ka lynter jong ka dam na ka 70 m sha ka 165 m bad ka jingbuh ïa ki khyrdop pyllait um na kawei sha ka laitylli. Kumta, la pynkylla lut ïa ka rukom pynwandur ïa ka dam.
Ka jingtih shuh ïa ka khyndew na ka bynta ban pynskhem ïa ka Jackwell, la ong ba ka jingpynkynriah kham shaneng wah ïa ka dam ka la pynlong ruh ban hap kynriah ïa ka jack well ha kaba ka jaka ha sawdong ka jack well la donkam ban hap tih shuh, bad pynskhem ïa ka khyndew, bad kiwei kiwei.
Haba ïadei bad ka bailutksan na ka bynta ki Dorbar Shnong, la ong ba ha kaba nyngkong, kam shym la don ka jingdawa bai lutksan na ki nongshong shnong/Dorbar Shnong na ka bynta ban pynïaid ïa ki raw water pumping pipelines ha baroh ki jaka shnong. Hynrei, ïa mynta, ka don ka jingdawa ïa ka bailutksan na ka bynta kane.
Halor ka jingdonkam la ka jong ka bording, halor kane ka jingdonkam kam shym la paw ha ka DPR kaba nyngkong bad ka jingpynbiang la ka jong ka laiñ bording ka long kaba donkam na ka bynta ka jingbit jingbiang jong ka dam. Hynrei ka jingdonkam ïa kane ka bording yn dang bishar bniah biang.
Ka jingshna biang ïa ka surok, la ong kumba 1.5 km jong ka surok PWD kaba don la hap ban pynpra noh bad tih ban pynïaid ïa ki pipe namar ka jingpynkylla ha ka jingpynbeit ïa u Pumping Main ha shnong Jaroit bad Diengpasoh. Ym lah ban kiar ïa kane namar ka jingkylla jong ka jaka shna ïa ka dam.
La ïathuh ba ka jingkynton ïa ka jinglut, ka la kiew da 43.55%. Ka jinglut baroh: la pynthymmai na ka 538.44 klur sha ka 772.96 klur. Ka jingïapher da 234.52 klur.
Kine ki jingpynkylla ki la nang kynton ïa ka jinglut na ka bynta ki jingshna ïa ki jingtei, ki kor ki bor bad ka bording kynthup ïa ka bailutksan na ka shim jaka kaba pynlong ïa ka jingmang tyngka kaba nyngkong ban nym dap.
Ka jingpynthymmai ïa ka jingmang pisa ka long kaba donkam ban, pynthikna ïa ka jingshngaiñ ka mariang bad ki sawdong sawkun da kaba kiar na kaba ïajan bad ki jaka pynkhuid ñiut. Ban wanrah jingshngaiñ ïa ki jingtei bad ki jaka ba pynïaid ïa ka um lyngba ki pipe sha ka dam bad ka jackwell, ban wanrah ka jingïatreilang bad ki nongshong shnong da kaba siew bailutksan.
Ban pynthikna ïa ka bording kaba biang ïa ki jingtei kiba kongsan na ka bynta ka jingsam umdih ka bym don jingthut. Ban pynbha biang ïa ki jingdon jingem ki paidbah kiba la shah ktah ha ka por ba pynïaid ïa ki pipe.