Ym dei ba ki trei ei. Kumba 15,000 – 20,000 tyngka yn ioh ki nonghikai ba leit lum Khasamari

Shillong, Jymmang 07 : U Symbud Myntri Rangbah ka Jylla Bah Prestone Tynsong ha ka sngi Palei u la ong ba ka jingpynrung ïa ki nonghikai ha ka kam lum khanasamari kam dei satia ban pynkhia ïa ka kam ba ki la don lypa bad ong ruh ba na bynta kito kiba trei ka sorkar ka ai ruh bad ka jingsiew kaba lah ban kot 15,000 – 20,000 tyngka.
Ïa kane u Symbud Myntri Rangbah u la pynpaw haba kren bad ki lad pathai khubor hadien ba bun na ki nonghikai ki la pynpaw ïa ka jingpyrshah kaba jur halor ka jingpynngat ïa ki nonghikai ban leit lum khanasamari.
Katkum ka jingong jong u Symbud Myntri Rangbah, ka jinglum khanasamari ha ka kylla ba nyngkong ki nonghikai da ka jingïarap lang ki nongsynshar shnong ki donkam tang kumba 30 sngi ei ei ban trei kata ruh tang kumba ar haduh kynta shisngi hadien ba la wai skul.
“Ha ka kylla kaba nyngkong ngi la dep khein ba kan shim por tang kumba 30 sngi ei ei ïa ki nonghikai ba kin leit sha kito ki shnong ban lum khanasamari kata ruh tyngkat bad ka jingsiew,” u la ong da kaba bynrap ba ka shong ruh ban pyndep 4-5 iing ha ka shisngi lane palat ïa kata ruh.
Haba jubab pat halor ka jingkam ki nonghikai ba la pynkhia ïa ka kam jong ki, u Bah Prestone u la ong ba ki nonghikai ruh ki sngewthuh ba kam dei satia kaba la pynkhia ïa ka kam jong ki namar ki don ruh ka jingmyntoi na ka jingsiew kaba ka sorkar ka la mang kyrpang.