Ujor FIR ka Ialong Toll Plaza ïa u nongïalam ka JNC ba khang lum khajna ïaki kali ML-04 & ML-11

Jowai, Jymmang 07: Ka Jaiñtia National Council (JNC) Western Zone, kaba la ïalam da u President jong ka, u samla Hamehi Bamon, ka la shem ïalade ha pdeng jong ka jingïakynad kaba nang jur mynta ka sngi hadien ba ka Ialong Toll Plaza, West Jaiñtia Hills, ka la ujor da ka FIR pyrshah ïa ka seng lyngba u President jong ka ha Phramer Traffic Cell, ha kaba ïadei bad ka jingkhang pyrshah ïa ka jinglum bai kali ha Pasyih/Ialong Toll Plaza.
Ïa kane ka FIR la register kum ka jubab halor ka jingïakhih jong ka seng ha kaba ka JNC ka la khanglad ïa ka Toll Plaza ban lum bai lutksan na ki kali kiba don ïa u nombar ML-04 bad ML-11 – ki official RTO codes jong ka West Jaiñtia Hills bad East Jaiñtia Hills. Ka seng ka pynskhem ba kine ki kali ki dei jong ki nongshong shnong trai ri trai muluk jong ka thaiñ Jaiñtia bad kim dei ban shah siew bai kali.
Haba ïakren bad ki lad pathai khubor, u President Hamehi Bamon u la ïathuh ba u la ioh pdiang ïa ka phone mynta ka step na Phramer Traffic Cell, West Jaiñtia Hills, ha kaba la bthah ïa u ban leit hajir hakhmat u Officer-in-Charge ha kaba ïa dei bad ka FIR. Mar ïa poi ha thanat, u Ophisar-in-Charge ula pyntip sha u Bamon ba u Deputy Commissioner (DC) jong ka West Jaiñtia Hills u la dep ban pynmih ïa ka hukum ha ka 17 tarik u Risaw 2026, kaba ai jingpyllait na ka bai lutksan ïa ki kali shimet kiba la register da ka ML-04 kiba dei jong ki 8 tylli ki shnong ba kynthup- Ialong, Pasyih, Phramer, Sabah Muswang, Muthlong, Mookaswan, Nangbah, bad Mihmyntdu. U ophisar u la ai jingmut shuh shuh ïa ka JNC ba ka rukom jong ka ban khang ïa ka jaka siew bai lutksan ka long kaba be-aiñ bad ka dei ban sangeh noh mardor.
Hynrei ka JNC Western Zone ka la kyntait jur ïa ka hukum ba pyllait u DC, da kaba ong ba ka dei ka jingpynïapher bad pynpharia kaba ai jingmyntoi arsap tang ïa ki katto katne ki shnong katba ka iehnoh ïa kiba bun ki nongshong shnong ha kylleng ki ar tylli ki District jong ka Jaiñtia Hills.
“Kane ka hukum ka pynïakhlad ïa ki paidbah jong ka Jaiñtia Hills. Ngim pdiang ïa kano kano ka jingpynbeit kaba shiliang, Ka jingdawa jong ngi ka long kaba shai, baroh ki kali kiba la pynrung kyrteng hapoh ka ML-04 bad ML-11 ki dei ban lait pura na ka jingsiew bai kali.
Ka JNCl ka la pynbna ba kan leit kynduh kyrkieh bad u DC ka West Jaiñtia Hills ban dawa ban weng ne pynkylla noh mardor ïa ka hukum jong ka 17 tarik u Risaw, 2026 ban kynthup lang ïa baroh ki kali ba la register ML-04 bad ML-11. Lada jia ba u DC um lah ban weng ïa ki jingdawa jong ki paidbah, ka JNC kala maham ba kan sdang biang bad pynjur ïa ka jingïakhih jong ka, da kaba khring ïa ka jingïashim bynta na ki nongshong shnong jong baroh ar tylli ki thaiñ West bad East Jaiñtia Hills kiba ju leit jingleit lyngba kane ka jaka siew khajna.
Nalor ka jingdawa ban pyllait, ka JNC ka la buh ruh ïa ki jingkylli kiba kongsan shaphang ka jinglong hok jong ka bai lutksan hi, da kaba kdew ba ka surok kaba la kdew ka la don lypa shwa ban seng ïa ka jaka lum khajna bad ba ym shym la ïohi ïa kino kino ki jingkylla kiba paw ha ka jinglong jong ka surok, ka jingtei, ne ki jingshna naduh ba la sdang treikam ka plaza.
“Ka surok ka la don hangne shwa ba kan wan ka jaka siew bai lutksan. Hadien ba ka la wan, ym shym la kylla ei ei – ka surok ka long kumjuh. Ka jingkhrong bad ka jingtei kim ïahap,” la ong u Bamon, da kaba bynrap ba ka council ka la pyrshah ïa ka bai lutksan naduh ba sdang jong ka halor kine ki nongrim.
“Phi lah ban kem ïa nga ne set ïa nga, hynrei ïa ka jingdawa jong ki paidbah dei ban pyndep. Kane kam dei shaphang jong nga ne shaphang ka seng – kane ka dei ka sur jong u Paidbah jong ngi,” Ong u President ka JNC WZ.
La ïathuh ruh ïaka jinglong jong ki nongtrei toll plaza, kiba bun na ki, ula kynnoh, ki dei ki nongtrei bym dei ki riewlum ki bym sngewthuh ne kheiñ ïa ka hok bad ka jingim jong ki nongshong shnong. “Ki ïathuh ïa ngi – ‘kaei ka jingeh ban siew tang ?30 ne ?40?’ – hynrei kim sngewthuh ba na ka bynta ki nongshong shnong kiba ïaid lyngba ïa kane ka plaza bunsien ha ka shisngi, lane kito kiba ïaid tang khyndiat por, kane ka long kum ka jingkit kaba khia ha ka liang ka pisa tyngka man ka sngi” la ong u Bamon.
Ka JNC Western Zone, ka la pynbna ba ha kine ki sngi ban wan, ka Executive Committee (EC) jong ka, kan sa khot ïa ka jingïalang kaba kyrkieh, ha kaba yn ïadon bynta lang da ki nongïalam ka CEC, ban ïapyrkhat ïa ka lynti ïaid shakhmat, Ka Council ka la maham lypa, ba lada u DC um jubab ne ñiewkor ïa ki jingdawa jong ki paidbah, ka JNC kan sa pynlong ïa ka jingïakhih kaba heh kynthup, lada donkam, beit beit ha khmat ka jaka treikam jong u DC.