Pynrem ka KSU ïa ka jingpyndonkam da ka ktien Garo ha ka shithi jong ka Ophis ADO Ranikor

Mawkyrwat, Jymmang 07: Ka Khasi Students’ Union (KSU) South West Khasi Hills District ka la pynrem jur ïa ka jingleh thurmur jong ka Ophis u Agriculture Development Officer (ADO) Ranikor C&RD Block, hadien ba katei ka ophis ka la phah shithi sha ka shnong 25 Miles da kaba pyndonkam ïa ka ktien Garo.
Haba kren ha ki lad pathai khubor, u bah Plosborlin Kharjahrin uba dei u Secretary Environment & Cultural Cell jong ka KSU South West Khasi Hills District ka la pynpaw ïa ka jingsngewkhia halor kane ka bynta da kaba kdew ba ka ophis kam shym la wad bniah ne bud ryntih ïa ki kyndon jong ka Ordinance 2026. “Katkum ka Section 4 jong katei ka aiñ, la kren shai ba watla ha ka jylla Meghalaya la ithuh ïa ka ktien Khasi, Garo bad English kum ki Official Languages, hynrei ha ki thaiñ Khasi bad Jaiñtia dei ban pyndonkam tang da ka ktien Khasi lane English ha ki jingïadei paidbah bad ki kam ophis”, ong u bah Kharjahrin.
Ym tangkata, ula ong ruh ba ka jingpyndonkam ïa kawei pat ka ktien kaba ym hap hapoh ki kyndon jong katei ka aiñ ka pynpaw ïa ka jingbym shimkhia bad jingbym burom ïa ka ktien jylla bad ïa ki paidbah nongshong shnong jong ka thaiñ Khasi.
Namar kata, ka Seng ka la dawa ïa ki bor ba dei peit ba kin shimkhia mardor halor kane ka bynta bad ban pynthikna ba ki ophis sorkar baroh hapoh ka Jylla ne wat hapoh ka South West Khasi Hills District kin bud ryntih ïa ki kyndon jong ka Official Language Ordinance 2026.