Nongstoiñ, Jymmang 7: Ka jingdon jong ka sub health centre ha ka shnong Kyrshai West Khasi hills kaba dei ruh ka shnong kaba don ha khappud bad ka Assam ka la ai jingmyntoi shibun ïa ki paitbah nongshong shnong khamtam ïa ki longkmie kiba armet kiba don kam ban leit phah checkup man ka taïew.
Wat la ka sorkar ka la pynbiang ïa ki nongtrei ha katei ka jaka sumar hynrei kat kum ka jingïaid ka por ka la idonkam ban kyntiew kyrdan noh ïa katei ka sub health centre sha ka Primary Health Centre.
U bah Probin Snar secretary ka FKJGP Kyrshai area unit haba ïakren bad u nongthohkhubor u la ong ba ha kaba ïadei bad ka jing angnud jong ki paitbah ban kyntiew kyrdan ïa katei ka sub health centre sha ka Primary Health Centre ki nongïalam ka seng ki la dep aiti da ka jingthoh sha ka ophis jong u Diatrict Medical & Health Officer jong ka West Khasi hills ba un pyngsew sha ka sorkar ba kan shimkhia halor katei ka mat hynrei haduh mynta ka seng kam shym pat la ïoh jingtip ba ka sorkar ka la leh kumno.
Utei u nongïalam ka seng u la ong ruh ba ka shnong Kyrshai ka hap hapoh ka Nongstoiñ C&RD Block bad ka jngai kumba 70 kilomitar haduh Nongstoiñ hynrei haduh mynta ym pat don surok satia lait noh tang haduh Mawthir katba na Mwathir haduh Kyrshai ka jing jngai ka dang don sa kumba 45 kilomitar.
U la ong ruh ba ki don kumba 15 tylli ki shnong kiba hap ha katei ka area ba kynthup ïa ka Mawpun, Nongspung, Ukiam, Borkhuli, Doledonga, Warigro, Umdiengsiar, Hasem, Umthli, Umdiengphiang,Talimara, Mawdiangkop, Darephang, Umbah, Umkhamdor, Patharphlangbad haba ki don ki nongshong shnong kiba la shitom jur ki hap ban leit phah sumar sha Assam hynrei ïa ki nongpang kiba la leit ban phah checkup ha katei ka sub health centre la hap ban phah sha Aradonga PHC ne sha Nongstoiñ kumta ka shem jingneh bha ïa kito ki long ïng kiba duk ba kyrduh namar ka la jngai than bad ka la ktah shibun ha ka bai leit bai wan nalor ka bai dawai bad kiwei kiwei.
Ha kajuh ka por u la ong ba dei halor katei ka jingeh kim banse ban shim ïa ka jingkitkhlieh bad ban pynkynmaw biang ïa ka sorkar ba ka sorkar kan thaw ki lad ki lynti na kabynta ban kyntiew kyrdan noh ïa katei ka Sub Health Centre ha Kyrshai sha ka Primary Health Centre khang ba ki paitbah kin ïoh ïa ka jingsumar kaba biang.
