Sdang ka SSA ïa ka samoi ïalehkai phutbol u snem 2026 da ka lympung 4th Division

Shillong, Jymmang 07: Ka samoi ïalehkai u snem 2026 jong ka Shillong Sports Association (SSA) kala sdang hynne ka sngi Palei ha madan Firts Ground-SSA Stadium, Polo Shillong da ka jingplie paidbah ïa ka U20 Fourth Division da u Myntri Rangbah Conrad K Sangma, uba la ïashimbynta ha ka jingïalang kum u kongsan.
Ha kane ka sngi la donlang ruh da u Myntri ka tnad Sports & Youth Affairs, Bah Wailadmiki Shylla, kum u Symbud Kongsan, u Myntri Sports barim bad Presdent ka SSA Bah Banteidor Lyngdoh, nalor ki nongkitkam jong ka Associaton, bad ki kynhun ïalehkai ba ïashimbynta, ki rang ialehkai bad ki riew ieid phutbol.
Ha kane ka jingialang, u Myntri Rangbah ula pynbna paidbah ruh ba la plie ia ka samoi ialehkai phutbol 2026 bad ula pynher ia ka lama ka SSA, kum ka dak ka jingpynsdang ia ka jingialehkai league ka samoi.
Haba ai jingkren ha kane ka sngi, u MR ula ai khublei ïa ka Meghalaya Football Association bad ïa ka Shillong Sports Association namar ka jingïai pyrshang ba khlem sangeh jong ki ha kaban pynkhlaiñ bad kyntiew ïa ka jingïalehkai phutbol hapoh ka Jylla.
“Ka phutbol ka bat ïa ka jaka ba kyrpang ha ka dohnud jong ki briew jong ngi, bad ki samla ki ju pyni ïa ka jingieid ïa kane ka jingïalehkai. La bun bun snem, ngim shym la lah ban ai ïa ka rynsan, ka jingkyrshan bad ka lad ba ka phutbol ka dei ban ïoh. Nga kmen ba ha kine ki khyndiat snem, lyngba ka jingïaipyrshang lang jong ka Sorkar, ki nongpynïaid Sports bad ki kynhun ba don bynta, ngi la lah ban kiew shaphrang” la ong u Conrad Sangma.
Haba pynskhem ïa ka thong ka Sorkar ban pynroi ïa ki kam ïalehkai, u Myntri Rangbah ula ong “Ka thong jong ngi ka long kaba shai-ngi kwah ïa ka Meghalaya bad khamtam ka Shillong, ba kan long ka Nongbah jong ka jingïalehkai phutbol (Football Capital) ha ka Ri India”.
Ula ban jur ba katba ka jingkynshew pisa ha ki jingtei ka long kaba donkam, hynrei dei ban buh jingmut mar katjuh ha kaba pynroi ïa ka bor briew ha ki jingïalehkai. “Ngi dei ban kynshew ha ki nongïalehkai, ha ki coach, ha ki lympung ïalehkai league jong ngi”.
“Ngi hap ban thaw ïa ki lad ki lynti ïa ki khynnah shynrang bad kynthei jong ngi ba kin ïakhun, ban nang kiew bad phohsniew ban mihkhmat ïa ka jylla ha ki kyrdan kiba kham shalor”.
U la pynbna ïa ka jingïarap pisa ba T.32 lak na ka Chief Minister’s Special Grant na ka bynta ban lah pynlong ïa ka samoi ïalehkai phutbol u snem 2026 kaba jop.
Na ka liang jong u General Secretary ka SSA Bah Dipshon L Nongbri, ula ai khublei ïa u Myntri Rangbah bad ka Sorkar Jylla namar ka jingkyrshan ba khlem sangeh ha kaban pynroi ïa ka jingïalehkai phutbol ha Jylla, kaba la pynlah ïa ka synjuk ban pynlong ïa baroh san tylli ki Division (naduh 4th haduh SPL) kaba jop, kynthup ruh ïa ka Women’s League bad ki lympung ïalehkai ha ki shnong ki thaw.
Haba kren halor ka jingkyrshan pisa jong ka sorkar, ula pyntip ba kumba 95% na kane ka pisa bala ïoh la lah ban pyndonkam kum ka song khusnam sha ki kynhun kiba rah ïa ka nam lahduh.
La ai sngewbha ruh ïa ki jersey ka SSA bad ki mementos sha ki kynrem ki lyndan, bud sa ka jingpynithuh ïa ki kynhun ïalehkai ba ïashimbynta.
Ka samoi ka la sdang da ka jingïalehkai U20 Fourth Division Football League hapdeng ka Mawnianglah Youth Sports Association bad ka Sei La Sap FCC. Ha kane ka jingïalehkai ka Mawnianglah Youth SC kaba la jop da 2-1 ban lamkhmat ïa ka Group E.
Baroh ar tylli ki kol jong ka Mawnianglah la thep da u Riborlang Kharkongor ha ka minit kaba 70 bad 74, katba ka shi kol jong ka Sei La Sap FCC la thep da u Mebaniohnam Lyngdoh ha ka minit kaba 25.
Ban shu kdew hangne, ki don 32 tylli ki kynhun ne ki klob kiba la pyndep ïa ka jingpynrung kyrteng bad la phiah ïa ki ha ki hynriew tylli ki Group ba mar san kynhun, lait noh tang ka Group D bad E kiba don mar hynriew tylli ki kynhun. Kawei kawei ka jingïalehkai la ai por 80 minit bad ka jaka la buh ban pynlong ha SSA Stadium lane ha MFA Ground ha Polo.
Kin don lai tylli ki jingïalehkai ha kane ka sngi Thohdieng (08 tarik Jymmang, 2026).
Ha ka por 1 baje mynsngi ka Summit Football Academy kan aireng pyrshah ïa ka Laitkroh SC, bud sa ka jingïakhun ha ka por 4 baje nohphai sngi hapdeng ka Diengpasoh SC pyrshah ïa ka Umiew S&CO (baroh kidei na ka Group E) kiban long ha SSA Stadium. Kawei pat ka jingïalehkai kan long ha ka por 1 baje mynsngi ha MFA Ground hapdeng ka Imson SC pyrshah ïa ka Lumkseh SC (Group A).