Jurip u President ka MCA ïa ka madan kriket ha Hilland
Kular ban ai jingïarap ban kyntiew ïa ka jingïalehkai kriket ha SWKH
Mawkyrwat, Jymmang 07: U President ka Meghalaya Cricket Association (MCA), u James Sangma, ha ryngkat ka jingïadonlang u bah Renikton Lyngdoh Tongkhar, u MLA ka Mawkyrwat Constituency bad ki dkhot ka South West Khasi Hills District Cricket Association, ki la hiar jurip ïa ka madan kriket jong ka Association kaba don ha ka shnong Hilland, South West Khasi Hills District.
Ha kane ka jingjurip, u Bah James Sangma u la kular ban ai jingïarap ïa ka District Association na ka bynta ban pyntrei bad pynbha ïa kane ka madan ïalehkai kaba heh kumba hynriew acre ei ei.
Shuh shuh, u la kular ruh ban pynshna ïa ka Indoor Stadium ha ka madan jong ka Association kaba don ha ka shnong Mawten, kum shibynta ban kyntiew bad pynkhlaiñ ïa ka jingïalehkai kriket hapoh ka distrik.
Ha kane kajuh ka sngi, u Bah James Sangma u la plie ruh ïa ki saw tylli ki Cricket Centre ha ki shnong Hilland, Pyndenumsaw, Ngunraw bad Marshilong. Kine ki centre kin long kum ki shlem ai jinghikai ïa ki khynnah, ban pyntbit ïa ki naduh ba ki dang rit bad ban pynroi ïa ka sap jingïalehkai kriket ha ka thaiñ.