Mynjur ka Kynhun Myntri ban wanrah jingpynkylla ha ka Meghalaya Building Byelaws, 2021

Shillong, Jymmang 5 : Ki trai jaka ha ki jaka sor mynta kin ïoh lad ban tei ïa ki ïing ba bun mala kum ki hotel ne guest house hadien ba ka kynhun myntri mynta ka Sngi Ba Ar ka la rai ban pynhiar noh ïa ka jingdonkam ka jingheh ka jaka naka bynta ki projek ba kyrpang kat kum ka Meghalaya Building Byelaws 2021.
U ma Wailad Shylla nongpathai khubor ka sorkar MDA u la ïathuh ïa kane ka jingpynkylla ïa ka Meghalaya Building Byelaws 2021 la mynjur mynta ka sngi da ka kynhun myntri bad kane kan ïarap ïa ki trai jaka ba kin lah ban tei ïa ki projek wat la ka jaka jongki ka rit ruh.
Baroh shi katta na ka bynta ki projek ba kyrpang donkam ban don 50,000 sq.ft ka jaka bad kaba rit eh ruh 20,000 Sq.ft. Mynta pat la lah ban tei ha ka jaka ba 37,500 Sq.ft bad kaba rit eh ruh 15,000 Sq.ft.
Kine ki projek ba kyrpang ki long kum ki hotel, ki tnad pule, ki jaka ai jingsumar, ki shoping malls, ki multiplex, ICT, BPO bad kiwei kiwei.
“ Ngi la ïohi ba kiba bun ki trai shnong ha kane ka jylla kim don ki jaka haduh 50,000 Sq.ft kumta ngi la wanrah ka jingpynkylla da kaba pynhiar noh ïa ka jingdonkam ka jingheh ka jaka sha ka 37,500 Sq.ft bad kaba rit eh ruh 15 000, sq.ft. Kane ka long kum ka jingpynshlur ïa ki trai jaka ha sor ba kin lah ban shna ïa ki projek ba kyrpang wat la hap ban tei bun mala shalor ruh” pynkut u ma Wailad.