5000 haduh 1 lak tyngka yn shah daiñ kuna ki nongbylla bar jylla lada ym rejister kyrteng maham u DC ka EGH

Shillong, Jymmang 5 : U Deputy Commissioner ka East Garo Hills (DC ka EGH) ula pynmih ïa ka jingbthah paidbah ba shim khia ban regjister kyrteng ïa baroh ki nongbylla bar jylla ha ka District hapoh ka Meghalaya Identification and Registration (Safety & Security) Act, 2020, haba maham ban shah daiñ kuna bad shah set along ïa kiba pynkheiñ aiñ.
Ka jingbthah ka ong ba kine ki sienjam ki dei kiba la shim da ka jingthmu ban pynthikna ïa ka jingshngaiñ, ka jingpynneh ïa ka suk ka saiñ, bad iada ïa ka hok jong ki nongbylla bad ki nongshong shnong.
“Ki migrant worker ki mut ïa kino kino ki briew ki bym dei ki nongshong shnong ka Jylla kiba ïoh bylla ha kano kano ka jaka trei. Baroh kine ki nongbylla ki hap ban rejister bad ïoh ïa ka registration card kaba treikam” ong ka jingbthah.
La tynrong ïa ka jingbahkhlieh ha ki nongaikam ba kin pynthikna ba ki nongbylla bar jylla ba ki ai kam, kin dei kiba la pynrung kyrteng ïalade lyngba ka online portal http:/www.investmeghalaya.gov.in da kaba aiti ïa ki kot ki sla kum ka Aadhaar, EPIC, lane PAN card ha ryngkat bad ka dur.
La ong ruh ba ïa ka jingpynrung kyrteng lah ban leh offline ha ka Ophis jong ka Tnad Labour lane ha ka Deputy Labour Commissioner, East Garo Hills.
U DC ula maham ba ka jingbym bud ryntih ïa kane ka jingbthah kan khring ïa ka jingshah daiñ kuna.
“Ki nongaikam ki bym pynrung kyrteng ïa la ki nongtrei bylla ki lah ban shah daiñ kuna hapdeng 5000 haduh 1 lak tyngka bad ka jingpynkheiñ arsien laisien, ka lah ban lam sha ka jingshah set along. Ki nongbylla bym pynrung kyrteng ruh ki lah ban shah daiñ kuna” ong ka jingbthah.
Ka la bynrap ruh, “Kano kano ka jingleh donbor lane ñiew beiñ pyrshah ïa ki nongbylla bar jylla ka dei kaba ngat ha ka jingpynshitom kat kum ka aiñ”.
“La bthah ïa baroh kiba don bynta ba kin bud pyrrkhing ïa ka jingbthah na ka bynta ka jingshngaiñ bad jingshong aiñ” pynkut ka jingbthah.