Ka jingtrei shitom ka wanrah ïa u soh ka jingjop, kwah ka Priya ban pyntbit ha ka kam Reserch

Shillong, Jymmang 4: Ka samla Priya Ghosh jong ka St Edmund Higher Secondary School kaba wan ba nyngkong ha ka eksamin HSSLC Commerce, kala ong ba ka jingjop jong ka kam dei eh tang ha ki Marks ba ka ïoh.
Ka Priya Ghosh kaba ïoh 458 Marks, ka la ong ba ka Result ka pynpaw ïa ka jingkyrshan na ki bahaïing hasem bad ki nonghikai kiba la pynwan dur ïa ka jinglong bad ïa ka akor ba ka don.
“Nga la ïoh bat ïa ka kyrdan ba nyngkong ha ka eksamin HSSLC. Nga tharai ba ka jingtrei shitom jong nga ka la sei soh” la ong Priya.
Ka Priya ka la ai burom ïa ka ïing ka sem , khamtam ïa u hynmen Suman Das uba pynkhreh kot ïa ka naduh ka klas IV.
“Ki nonghikai jong nga, ki kmie ki kpa jong nga, u hynmen jong nga — baroh ki la trei shitom bad ki la don ka bynta kaba khraw ym tang ban pynwan ïa ka jingpule jong nga hynrei ki la pynrung ha nga ïa ki jinglong babha, ka akor kaba nga pyrkhat ba ngan ïai bteng ban bat nangne shakhmat ha ka jingim jong nga” ka la ong.
“Ka Class Teacher jong nga ka ju pynshlur ïa nga haba nga shem jingeh, ka la pynshlur bad ka la ong ïa nga ba ngam dei ban kynran dien” la ong ka Priya.
Ka la batai ba u Nonghikai Felix u long kum “kum u kpa uba la ïarap bad pynshlur ïa nga naduh ka sngi kaba nyngkong ba nga wan pule ha St Edmund’s.”
Ka Priya ka la kdew ba ka klas XI kum ka jingsdang haba ïadei bad ka eksamin klas XII. “Ka nongrim ba nga ïoh naduh klas XI ka don ka bynta kaba kongsan ha ka jingjop bad nga la long kaba ïaineh ban trei shitom naduh ka klas XI. Ki nonghikai jong nga ki la ïohi ïa ka jinglah ha nga, ki ju pynshlur ïa nga. Ki dei ki mawsiang bad ki nongkyrshan jong nga,” ka la ong.
“Baroh ki nonghikai ha skul kim la pynlong ïa nga ym tang ka khynnah skul kaba bha, hynrei ki la pynlong ïa nga ka briew kaba bha.”
Haba kylli, ka samla Priya ka la ong “To bud ïa kaei kaba phi sngewtynnad, ieid ïa kaei kaba phi leh bad ai ïa kaba bha tam jong phi katba phi lah ban leh. Bad ym tang ba phin long kiba bha ha ka kam jong phi, to long kiba bha kum ki briew bad ïarap ïa kiwei ban sngewthuh kata ruh ka pynlong ïa phi kawei na ki nongjop”.
Ka samla Priya ka la pynpaw ba ka kwah ban leh Research ha ka Finance hynrei ka sngewtynnad ruh ban phaikhmat shaka Public Service.
Haba ïadei bad ki jingpyndonkam ïa ki rynsan Social Media, ka samla Priya ka pynpaw ba donkam ban bate ïa ka por haba pyndonkam ïaki. “Nga tharai ba ka social media ka la ïarap bha ïa nga. Ki samla pule kim dei ban pynleit jingmut tang haki kot skul, ka social media ka la don ka bynta kaba khraw ha ka jingtip kyllum jong nga. Ka shong ha ka rukom ba phi pyndonkam ïa ka social media” ka la ong.
Watla katta ruh haka por eksamin, ka samla Priya ka la kyntait ban pyndonkam ïa ki, “Ha ki ar bnai ba nga la pynkhreh ïa ka eksamin, ngam shym la pyndonkam ïa kino kino ki social media, nga hap ban pynleit jingmut beit tang haka jingpule” ka la ong.
“Ka jingpule ka long kaba kongsan hynrei ha kajuh ka por kumno phin sngewtynnad ïa ka jingim jong phi, ka long kaba kongsan shibun. Namar nga pyrkhat ba ka jingpule jong nga ka la pynlong ïa nga ban ïoh kheit ïa u soh ka jingjop, nga kwah ban ong ïa kiwei pat ki samla pule, sngewtynnad ïa ka jingpule bad ha kajuh ka por pynsngewbha ïa ka jingim jong phi ruh”, la ong ka Priya.